दार्जीलिङ, 18 मार्च, कयेश अंसारी
कोरोना भाइरस प्रकोपको रोकथामको प्रयास स्वरुप कडा कदम उठाउँदै गोर्खाल्याण्ड क्षेत्रीय प्रशासन जीटीएले भोलीदेखि 15 अप्रेलसम्म स्वदेशी र विदेशी पर्यटकहरुको आगमनमा रोक लगाएको छ । यसका साथै पहिलैदेखि रहेका पर्यटकहरुलाई पनि चाँडोभन्दा चाँडो दार्जीलिङ पहाड छोड्न भनिएको छ । आज दार्जीलिङको लालकोठीमा जिल्ला प्रशासन र विभिन्न सम्बन्धित पक्षसँग बैठक गर्दै जीटीएले यस्तो निर्णय गरेको हो । जीटीए अध्यक्ष अनित थापाले भोलीबाट दार्जीलिङ पहाडमा कुनै पनि पर्यटक नबोक्न आग्रह गर्दै सबैका लागि यसबारेमा कडा अधिसूचना जारी गर्न जिल्ला प्रशासनलाई आग्रह गर्नुभएको छ । उहाँले पहाडका होटल व्यवसायीहरुलाई आग्रह गर्दै कुनै शुल्क नलिएर अग्रिम बुकिङ नगर्न र पहिलेनै गरेको बुकिङ पनि रद्द गर्न आग्रह गर्नुभएको छ ।
भीड र भेलाहरुमा भाइरसको प्रकोप छिट्टै हुने भएकाले जीटीए क्षेत्रका सामूदायिक हल र हाटहरु आगामी 15 अप्रेलसम्मका लागि बन्द गर्ने निर्णय लिइएको छ । अध्यक्ष थापाले राजनितिक दलहरुलाई कुनै कार्यक्रम नगर्न आग्रह गर्दै त्यसका लागि अनुमति नदिन पनि पुलिसलाई आग्रह गर्नुभएको छ ।
त्यसैगरि पहाड बाहिर अध्ययन गर्ने विद्यार्थीहरु फर्किदा स्क्रीनिङ गर्ने र प्रवेश गर्ने ठाँउहरुमा थप स्क्रिनिङ शिविर लगाउने पनि निर्णय बैठकमा गरिएको छ । थापाले पहाडमा जनशक्तिको अभाव भएकाले विकास कार्यलाई कम गरेर त्यसमा लागेका मानिसहरुलाई शिविरमा प्रयोग गरिने बताउनुभयो । बैठकमा निगरानी गर्न र कमीलाई पुरा गर्न एक समन्वय समिति पनि गठन गर्ने निर्णय गरिएको छ । जीटीएले ग्रामिण क्षेत्रहरुमा निशुल्क मास्क र ह्याण्ड सेनिटाइजरहरु पनि वितरण गर्नेछ ।
