नयाँ दिल्ली, 21 मार्च
संयुक्त अरब इमिरेट्स (युएई)बाट काठमाडौं फर्किने क्रममा दिल्लीको इन्दिरा गान्धी विमानस्थलमा अलपत्र परेका २८ नेपालीहरु आज स्वदेश फर्किएका छन । हिजो एयर इन्डियाको विमानबाट काठमाण्डौ जानुपर्ने भएपनि कोरोना भाइरसको परीक्षणका लागि भन्दै रोकिएका उनिहरुलाई दिल्लीस्थित नेपाली दूतावासको हस्तक्षेप काठमाण्डौ पठाइएको हो । हिजो विहान 4 बजे युएईबाट नयाँ दिल्ली पुगेका उनिहरुलाई कोरोना परीक्षणका लागि भन्दै विमानबाट झारिएको थियो । त्यसपछि एयर इण्डियाका कर्मचारीहरुले उनिहरुको विमान छुटिसकेको भन्दै सबैको बोर्डिङ पास पनि खोसेर काठमाण्डौ फर्किने भए 30 देखि 40 हजार भाडा लाग्ने बताएर अभद्र व्यवहार गरेको उनिहरुले बताएका थिए ।
आफुहरु जाने विमानमा अर्कै यात्रुहरुलाई काठमाण्डौ पठाइएको पीडित नेपालीहरुको भनाई छ । एयर इन्डियाका कर्मचारीहरुले मागेको जति भाडा नदिए नलैजाने भनेको पनि उनिहरुको आरोप छ ।
हिजो विहान 4 बजेदेखि अलपत्र परेका उनिहरुका बारेमा जानकारी पाएपछि नेपाली दूतावासका नियोग उप प्रमुख भरतकुमार रेग्मीले एयर इन्डियाका अधिकारीलाई फोन गरि उनिहरुलाई सकुशल नेपाल फिर्ता पठाउन भनेपछि आज विहान पठाइदिने जवाफ दिएको राजनितिक काउन्सिलर हरि ओडारीले नेशनल लाईवलाई जानकारी दिनुभयो । उनिहरु रातभरि विमानस्थलमै बसेर आज विहान 7 बजेको फ्लाईटमा नेपाल फिर्ता गएको ओडारीले बताउनुभयो ।
