काठमाण्डौँ, 28 मार्च 2020/ हिम शाह
नेपालमा कोभिड-19 बाट संक्रमितको संख्या पाँच पुगेको छ। आज थप एक जना कोरोना भाइरस (कोभिड-19) संक्रमण भएको पुष्टि भएको हो। बेल्जियमबाट नेपाल आएकी बागलुङकी एक युवतीमा कोरोना भाइरस (कोभिड-19) संक्रमण पुष्टि भएको छ। युरोपबाट फर्किएकी 22 वर्षीया युवतीमा संक्रमण पुष्टि भएको हो।
यससँगै नेपालमा कोभिड-19 बाट संक्रमितको संख्या औपचारिक रुपमा पाँच पुगेको छ। उनीहरू मध्ये एक निको भएर घर गइसकेकी छन् भने दुई जनाको टेकुस्थित शुक्रराज ट्रपिकल तथा सरुवा रोग अस्पताल र एकको सेती प्रादेशिक अस्पतालमा उपचार भइरहेको छ।
अहिले संक्रमण देखिएकी बागलुङकी युवती चैत 4 गते नै कतार एयरवेजको ‘क्यूआर 652’ विमानबाट नेपाल आएकी थिइन्। त्यही विमानमा आएकी 19 वर्षीया युवतीमा कोरोना भाइरसको संक्रमण भएको 10 चैतमा पुष्टि भएको थियो। त्यसपछि विमानमा सवार 158 यात्रुको खोजी थालिएको थियो। त्यसक्रममा बागलुङ नगरपालिकाकी ती युवतीको पनि धौलागिरी अस्पतालमा नमुना संकलन गरिएको थियो।
नमुना संकलनपछि उनलाई अस्पतालमै बस्न भनिएको, तर आफ्नै घरमा बसेको बताईएको छ। अहिले कोराना भाइरसको संक्रमण पुष्टि भएकी उनलाई सुरक्षित रुपमा काठमाडौं ल्याउने तयारी भइरहेको छ।
