काठमाडौंँ, 2 अप्रेल
नेपालमा छैठौँ कोरोना भाइरस (कोभिड–19) को संक्रमित भेटिएका छन्। स्वास्थ्य मन्त्रालयको नियमित पत्रकार सम्मेलनमा मन्त्रालयका प्रवक्ता डा. विकास देवकोटाले नेपालमा कोरोना संक्रमित व्यक्तिको संख्या ६ पुगेको जानकारी दिनुभएको हो। छैठौँ व्यक्ति पनि चैत 4 गते कतारको दोहाबाट कतार एयरवेजको विमान क्यूआर 652 बाट नेपाल आएको डा. विकास देवकोटाले जानकारी दिनुभयो।
ती व्यक्ति कहाँका हुन् र कहाँ उपचाररत छन् भन्नेबारेमा भने मन्त्रालयले केही बताएको छैन। शुक्रराज ट्रपिकल तथा सरुवा रोग अस्पताल टेकुका एक चिकित्सकले भने, ‘पछिल्लो संक्रमित पुष्टि भएको बिरामी हाम्रोमा भर्ना भएको हो कि अन्तको हो थाहा छैन, हामी खोज्दैछौं ।’
पहिलो कोरोना संक्रमित व्यक्ति भने उपचारपछि निको भइसकेका छन्। दोस्रो संक्रमित व्यक्ति काठमाडौंकी 19 वर्षीया युवती हुन्। उनी फ्रान्सबाट दोहा हुँदै कतार एयरवेजको क्यू आर 652 जहाजबाट काठमाडौं आएकी थिइन्। उनमा चैत 10 गते कोरोना संक्रमण पुष्टि भएपछि सरकारले देशभर लकडाउन घोषणा गरेको थियो। तेस्रो धादिङको, चौथो धनगढीको र पाँचौं बाग्लुङको व्यक्तिमा कोरोना संक्रमण पुष्टि भइसकेको छ।
