नयाँ दिल्ली, 6 अप्रेल
प्रवासी नेपाली मित्र मञ्च दिल्लीले लकडाउनले खान नपुगेका नेपालीहरुको समस्या आफुहरुले समाधान गर्ने बताएको छ । दिल्लीस्थित नेपाली राजदूतावासलाई एक पत्र लेख्दै मञ्चले खान नपुगेका नेपालीहरुको बारेमा जानकारी आए आफुहरुलाई जानकारी दिन भनेको हो । पछिल्लो केहि दिनमै 121 नेपाली परिवारहरुलाई खाद्यान्न सहयोग गरिसकेको भन्दै मित्र मञ्चले आफुहरुसँग अझै खाद्यान्न उपलब्ध रहेकाले समस्यामा परेका नेपालीहरुलाई जानकारी दिन आह्वान गरेको छ ।
आफुहरुलाई दिल्ली वरपरबाट समस्यामा परेका नेपालीहरुको फोनहरु लगातार आइरहेको र आफुहरुले पनि उनिहरु भएकै ठाँउमा पुगेर खाद्यान्न वितरण गरिरहेको भन्दै दूतावासमा कुनै नेपालीहरुले फोन गरेर सहयोग माग्छन भने आफुहरु सहयोग गर्न तयार रहेको जनाएको छ ।
मित्र मञ्चले आफ्ना पदाधिकारीको व्यक्तिगत सहयोग र नेपाली र भारतीय दाताहरुको सहयोगले 5 किलो चामल, 1 किलो दाल र नूनको किट तयार गरि वितरण गरिरहेको जनाएको छ । आफुहरुसँग 1 सय किट अझै बाँकी रहेको र आवश्यक परे अझै थप्न सकिने बताएको छ ।
