नयाँ दिल्ली डेस्क, 18 अप्रेल
कोरोना भाइरस कोभिड-19 को संक्रमण तीव्र गतिमा बढिरहेको छ। वैश्विक महामारीको रूप लिएको यस भाइरसबाट अहिलेसम्म 1 लाख 56 हजार 101 जनाले ज्यान गुमाइसकेका छन्। यस भाइरसबाट संक्रमित हुनेहरूको संख्या 22 लाख 75 हजार 705 पुगेको छ। 5 लाख 82 हजार 362 जना उपचारपछि ठिक भएर घर फर्किएका छन्। कोरोना भाइरसको कारण अमेरिकामा सबैभन्दा बढी 37 हजार 175 जनाको ज्यान गएको छ भने संक्रमितको संख्या 7 लाख 10 हजार 272 पुगेको छ। अमेरिकापछि इटाली कोरोनाबाट सबैभन्दा बढी प्रभावित बनेको छ। त्यहाँ 22 हजार 745 जनाको ज्यान गएको छ भने, 1 लाख 72 हजार 434 जनामा संक्रमणको पुष्टि भएको छ। त्यसैगरी स्पेनमा अहिलेसम्म 20 हजार 43 जनाले ज्यान गुमाएका छन्, भने त्यहाँ संक्रमितहरूको संख्या 1 लाख 91 हजार 726 पुगेको छ।
कोरोनाको उद्गम बिन्दु देश चीनमा संक्रमितहरूको संख्या 82 हजार 719 पुगेको छ भने, 4 हजार 632 जनाले ज्यान गुमाएका छन्। पछिल्लो 24 घण्टामा त्यहाँ एक जनाको पनि कोरोना भाइरसका कारण ज्यान गएको छैन्। चीनमा अहिलेसम्म 77 हजार 29 जना उपचारपछि सन्चो भएर घर फर्किएका छन्। 1 हजार 58 जनाको उपचार चलिरहेको छ।
भारतमा पनि कोरोना भाइरसको प्रकोप दिनप्रति दिन बढिरहेको छ। भारतमा अहिलेसम्म 14 हजार 792 जनामा कोरोना भाइरसको संक्रमण पुष्टि भएको छ। त्यसैगरी ज्यान गुमाउनेको संख्या बढेर 488 पुगेको छ। भारतमा पछिल्लो 24 घण्टामा 36 जनाको यस भाइरसको संक्रमणबाट ज्यान गएको छ। भारतमा 2 हजार 45 जना उपचारपछि सञ्चो भएर घर फर्किएका छन्।
नेपालमा कोरोना भाइरसबाट संक्रमित हुनेहरूको संख्या बढेर 30 पुगेको छ। नेपालमा हिजो एकैपटक 14 जनामा कोरोना भाइरसको संक्रमण पुष्टि भएको थियो। नेपालमा 2 जना उपचारपछि पूर्ण रूपमा स्वस्थ्य भएर घर फर्किएका छन् भने, बाँकी 28 जनाको विभिन्न अपस्पतालहरूमा उपचार भइरहेको छ। ती सबैको अवस्था सामान्य रहेको छ।
