वलसाड-गुजरात, 24 अप्रेल / टंकप्रसाद दाहाल
गुजरातको सुरतमा कोरोना महामारीको लडाईमा लकडाउन गरिएपछि भोकै प्यासै रहन बाध्य सयौं नेपालीहरुको भोको पेट भर्ने काम भइरहेको छ । मातृभूमि च्यारिटेबल ट्रस्ट सुरतका अध्यक्ष एवं अखिल भारत गोरखा समाज-वलसाड जिल्लाका मार्गदर्शक तथा समाजसेवी भूपेन्द्र राजपूत र नेपाली संघ सुरतका सदस्यहरुले सूरत जिल्लाका विभिन्न क्षेत्र एंव टोलमा पुगेर 1200 भन्दा धेरै नेपालीहरुलाई खाना र अन्य आवश्यक सामग्रीहरु वितरण गरेका हुन । मातृभूमि च्यारिटेबल ट्रस्ट नेपाली समाजले लकडाउनको समयमा दैनिक रुपमा खाना पकाएर सुरतका विभिन्न क्षेत्रमा नेपालीहरुलाई बिहान-बेलुकाको खाना खुवाउने काम गरेको छ ।
समाजसेवी भूपेन्द्र राजपूत र सुरतका नेपाली समाजले नेपालीहरुका साथ-साथै ड्युटीमा खटिएका पुलिस र गृहरक्षक कर्मचारीहरूलाई पनि भोजन ग्रहण गराइरहेका छन । भोकै रहन बाध्य भएकाहरुको भोको पेट भर्ने काममा स्थानिय आजाद न्यूज च्यानल पनि लागेको छ । सुरतका मातृभूमि च्यारिटेबल ट्रस्ट नेपाली समाजका भूपेन्द्र राजपूतले गरेको कामका कारण नेपालीहरुलाई राहत मिलिरहेको छ भने आफु सकेसम्म गुजरातमा रहेका नेपालीहरु भोको बस्न नदिने प्रतिवद्धता भूपेन्द्र राजपूतले गर्नुभएको छ ।
