काठमाण्डौँ, 25 अप्रेल
क्वारेन्टिनमा रहेका केही व्यक्तिहरुमा औँलो रोगको संक्रमण देखिएको छ। देशका विभिन्न ठाउँमा क्वारेन्टिनमा रहेका केही व्यक्तिहरुमा औँलो पोजेटिभ देखिएको स्वास्थ्य तथा जनसंख्या मन्त्रालयले जनाएको छ। क्वारेन्टिनमा रहेका व्यक्तिहरुमा परीक्षण गर्दा पोजेटिभ देखिएको मन्त्रालयका प्रवक्ता डा. विकास देवकोटाले बताउनुभयो। कुन ठाउँको क्वारेन्टाइनमा बसेका कति जनामा संक्रमण देखिएको हो भन्ने बारे भने मन्त्रालयले केही जानकारी दिएको छैन। क्वारेन्टिनस्थल व्यवस्थित बनाउन उहाँले सबैलाई आग्रह समेत गर्नुभएको छ। अहिलेको अवस्थामा गर्भवति महिला र बच्चहरुलाई लामखुट्टेको टोकाइबाट जोगाउन र व्यक्तिगत तथा वातावरणिय स्वास्थ्यमा ध्यान दिन पनि उहाँले आग्रह गर्नुभएको छ।
नेपालमा शनिबारसम्म 49 जनामा कोरोना संक्रमण पोजेटिभ देखिँदा 12 जना उपचारपछि निको भएर घर फर्किएका छन्। स्वास्थ्य तथा जनसंख्या मन्त्रालयका अनुसार भरतपुर अस्पतालमा उपचाररत 27 वर्षिय पुरुष शनिबार निको भएर घर फर्किएका छन्। यसअघि शुक्रबार धौलागिरी अस्पतालबाट 19 वर्षिया युवती उपचारपछि निको भएर घर फर्किएकी थिइन्। शुक्रबार नै झापामा 1 जना कोरोना संक्रमित देखिएका छन्। झापाको दमकका 62 वर्षिय पुरुषमा कोरोना पोजेटिभ देखिएको स्वास्थ्य तथा जनसंख्या मन्त्रालयका प्रवक्ता डा. विकास देवकोटाले बताउनुभयो। चैत 4 गते उहाँका छोरा दुबइबाट फर्किएका थिए। संक्रमण देखिएका पुरुषसँगै अन्य 3 जनाको आरडीटी पोजेटिभ देखिएपछि पीसीआर परीक्षण गरिएको थियो। पीसीआर गर्दा 1 जनाको रिपोर्ट पोजेटिभ आएको प्रवक्ता देवकोटाले बताउनुभयो। अहिले सबैभन्दा बढी विराटनगरमा 30, वीरगञ्जमा 5 तथा भरतपुर तथा धनगढीमा 1/1 जना गरी देशभरी 37 जना उपचाररत छन्।
परीक्षणको आँकडा करिब 50 हजार नजिक पुगेको छ। आरडीटी र पीसीआर विधिबाट गरी अहिलेसम्म 49 हजार 3 सय 36 जनाको कोरोना परीक्षण गरिएको छ। प्रवक्ता देवकोटाका अनुसार पीसीआर विधिबाट 9 हजार 6 सय 66 र आरडीटी विधिबाट 39 हजार 6 सय 70 जनाको परीक्षण गरिएको छ। पछिल्लो 24 घण्टामा 1 हजार 9 सय 45 वटा नमुना परीक्षण गरिएको प्रवक्ता देवकोटाले बताउनुभयो।
सुदूरपश्चिम प्रदेशमा आरडीटी परीक्षण सबैभन्दा बढी गरिएको छ। शनिबारसम्म त्यहाँ 10 हजार 2 सय 4 वटा नमुना परीक्षण भएका छन्। यसैगरी प्रदेश नम्बर 1 मा 4 हजार 1 सय 60, प्रदेश नम्बर 2 मा 4 हजार 44 र बागमती प्रदेशमा 7 हजार 4 सय 67 नमुना परीक्षण भएका छन्। गण्डकी प्रदेशमा 4 हजार 8 सय 61 प्रदेश नम्बर 5 मा 2 हजार 9 सय 50 र कर्णाली प्रदेशमा 4 हजार 9 सय 74 वटा परीक्षण भएका छन्।
देशभरी शनिबारसम्म 14 हजार 7 सय 31 जना क्वारेन्टाइनमा रहेका छन्। सबैभन्दा बढी प्रदेश नम्बर 5 मा 7 हजार 3 सय 56 र बागमती प्रदेशमा 1 सय 31 जना क्वारेन्टाइनमा रहेका छन्। उपत्यकामा 3 गरी बाहिर 84 गरी 87 जना आइसोलेसनमा रहेको प्रवक्ता देवकोटाले बताउनुभयो।
