काठमाण्डौँ, 29 अप्रेल
कोरोना भाइरस (कोभिड–19) संक्रमण रोकथामका लागि लकडाउन लागू भएसँगै मृगौला पीडित पत्रकार विजय कुमार पोखरेल (बी.के. पाल्पाली) को परिवार आर्थिक समस्यामा परेको छ। लकडाउनले काम गर्न नपाएपछि पत्रकार पाल्पालीको उपचार खर्च जुटाउन समस्या भएको उहाँकी श्रीमति रेणुका भट्टराईले बताउनुभयो। यस्तै घरमा खाद्यान्नको समेत समस्या भएको भट्टराईले बताउनुभयो। लकडाउन लम्बिदै गएपछि समस्या पनि थपिदै गएको उहाँले बताउनुभयो। आर्थिक समस्या परेपछि पत्रकार पाल्पालीले खाने औषधिको अभाव भएको छ, भने बालबच्चालाई भोकै सुताउनुपर्ने अवस्था आएको भट्टराईले बताउनुभयो। साहित्यकार समेत रहनुभएका पाल्पाली दुवै मृगौला फेल भएपछि 2070 साल यता उपचार गराउँदै आउनुभएको छ। आफु पनि मधुमेहको बिरामी भएकोले अझै बढी समस्या आएको श्रीमति भट्टराईले बताउनुभयो।
पाल्पाली नेपाल बोर्डर साप्ताहिकका प्रकाशन तथा सम्पादक हुनुहुन्छ। पाल्पालीलाई अहिले हप्तामा तीन दिन डाइलासिस गर्नुपर्छ। चिकित्सकको सल्लाह अनुसार सी.ए.पी.डी. विधि अनुसार घरमै डाइलासिस हुँदै आएको छ। तर लकडाउनले आम्दानी नभएको र सी.ए.पी.डी. डाइलासिस गर्ने औषधि खरिद गर्न नसकेको दुखेसो भट्टराईले पोख्नुभयो। पाल्पालीको परिवार भक्तपुरको सूर्य विनायक नगरपालिकाको सिपाडोलमा बस्दै आएको छ।
