काठमाण्डौँ, 2 मे 2020
चितवनको रत्ननगर नगरपालिकाले बाँझो जमिनमा सामूहिक खेती गर्ने अभियान सुरु गरेको छ। नगरापालिका भित्र बाँझो रहेका प्लटिङ तथा अन्य सार्वजनिक जग्गामा खेती सुरु गरिएको हो। ज्याला मजदुरी गरेर परिवार पाल्दै आएका विपन्न समुदायलाई उत्पादनशील क्षेत्रमा अग्रसर बनाउने उद्देश्यले बाँझो जमिनमा सामूहिक खेती सुरु गरिएको नगरपालिकाका मेयर नारायण वनले बताउनुभयो। उहाँका अनुसार रत्ननगर नगरपालिका वडा नम्बर 14 पिठुवामा रहेको करिब 30 विगहा बाँझो जमिनमा खेती गर्न सुरु गरिएको छ। नगरपालिकाले विपन्न वर्गका 3 सय परिवारलाई 50 समूह बनाई सामूहिक खेतीको सुरुवात गरेको हो। सामूहिक खेतीमा प्रोत्साहन गर्न नगरपालिकाले जमिन जोत्न तेल खर्चसँगै मकै र बोडीको बिउ उपलब्ध गराएको छ। यस्तै बाँझो जग्गा राख्नेलाई जरिवाना समेत गर्दै आएको छ।
विपन्न समूहलाई काम नभएर सरकारले राहत दिनुपर्ने तर जमिन बाँझो रहने स्थिति रहेकाले नगरभित्र रहेको सबै जमिनमा खेती गर्ने अभियान सञ्चालन गरिएको मेयर वनले बताउनुभयो। कोरोना भाइरस (कोभिड-19) को रोकथामका लागि लकडाउन गरीएपछि समस्यामा परेका विपन्न वर्गका लागि नगरपालिकाले 82 लाख रुपैयाँ बराबरको राहत वितरण गरेको थियो। काम नभएर राहत वितरण गर्नुपर्ने अवस्थाको अन्त्य गर्नका लागि नगरपालिकाले निःशुल्क जमिन र बिउबिजन उपलब्ध गराएको हो।
