नयाँ दिल्ली, 22 मई 2020
नेपालीहरु सीमामै अलपत्रमा पर्नसक्ने जोखिम मोलेर नेपाल फर्किरहेका बेला नेपाली जनसम्पर्क समिति भारतले यथास्थानमा सुरक्षित रहन आग्रह गरेको छ। भारतमा चौथो लकडाउन शुरु भएपछि केही दलालहरुले नेपाल पुर्याइदिने भन्दै चर्को भाडा असुलेर सीमामा अलपत्र पार्ने काम गरिरहेको भन्दै नेजस भारतले भ्रममा नपर्न आग्रह गरेको छ। भारतमा लकडाउनपछि अलपत्र परेका नेपालीहरुलाई सक्दो सहयोग गरिरहेको र आगामी दिनमा पनि गरिरहने बताउँदै यथास्थानमा सुरक्षित रहन भनेको हो।
पछिल्लो केही दिनमा भारतका सीमावर्ती क्षेत्रमा 2 महिना क्वारेन्टिन बसेका नेपालीहरु नगरपालिका र वडा तहमा समन्वय गरि नेपाल फर्केको जानकारी गराउँदै नेपाल फर्किन चाहने नेपालीहरुले आफ्नो नगर, गाँउपालिका र वडा प्रतिनिधिसँग समन्वय गरि यहाँ PCR परीक्षण गराई नेपालमा 14 दिनको क्वारेन्टिन बस्ने गरि जान सक्ने र नेपाल जानुअघि भारतमा आफु बसेको स्थानमा DM/SDM मार्फत सवारी पास लिएर मात्र जान सकिने बताएको छ। ठूलो संख्यामा अहिले नेपालको सीमामा नेपालीहरु जान नपाएको अवस्थामा भ्रममा परेर सीमामा पुगे संक्रमणको डरका साथै भोकै रहने स्थिति आउने नेजस भारतले ध्यानाकर्षण गराएको छ।
अहिले सीमा खोल्नेबारे नेपाल र भारत सरकारबिच कुनै आधिकारिक सहमति नभएको जानकारी गराउदै नेजस भारतले नेपालमा कोरोनाको संक्रमण बढ्दै गएकाले नेपाल सरकारले सीमामा कडाई गर्न निर्देश दिएको बेला दलालहरुको लह-लहैमा नलाग्न अपील पनि गरेको छ।
