धनगढी, 2 जुन 2020, हिम शाह
लकडाउनको अवधिमा भारतबाट फर्केका ४९ हजार नौ सय ५३ जनालाई सुदूरपश्चिम प्रदेशमा क्वारेन्टाइनमा राखिएको छ। स्वास्थ्य निर्देशनालय डोटीका अनुसार प्रदेशभरि ५६ हजार ५२ जना अटाउने एक हजार चार ६६ वटा क्वारेन्टाइन छन्। क्वारेन्टाइनमा राखिएकामध्ये ४३ हजार तीन सय ५७ पुरुष र ६ हजार पाँच सय ९६ महिला छन्।
निर्देशनालयका अनुसार सबैभन्दा बढी कैलालीमा १३ हजार दुई सय १२ जनालाई राखिएको छ। यस्तै, कञ्चनपुरमा सात हजार ६ सय ५१, डोटीमा सात हजार ६ सय ७३, बैतडीमा पाँच हजार तीन सय ८६, डडेल्धुरामा चार हजार दुई सय ५२, अछाममा चार हजार पाँच सय २४, बझाङ दुई हजार ६ सय ६९, बाजुरामा तीन हजार पाँच सय ७४ र दार्चुलामा एक हजार १२ जनालाई क्वारेन्टाइनमा राखिएको छ।
क्वारेन्टाइनमा रहेकाहरूमध्ये हालसम्म करिब एक हजार पाँच सयजनाको र्यापिड डायनोस्टिक टेस्ट (आरडीटी) भएको छ भने तीन सय जनाको मात्र पलिमराइज चेन रियाक्ट (पीसीआर) परीक्षण भएको छ।
