नयाँ दिल्ली, 6 जुलाई 2020
भारतको राजधानी दिल्लीमा 21 जना नेपालीहरु कोभिड-19 ले संक्रमित भएका छन । नेपालका विभिन्न स्थानबाट आएर रोजगारी गरिरहेका नेपालीहरु कोरोना भाईरसले संक्रमित भएका हुन । संक्रमित मध्ये 7 जना नेपालीहरु उपचारपछि सञ्चो भएर काममा फर्किसकेको दिल्लीको एम्स अस्पतालका डाक्टर सागर पौडेलले नेशनल लाईभलाई बताउनु भएको छ । नेशनल लाईभको विशेष संवाद कार्यक्रममा उहाँले भन्नुभयो “भारतमा वृहत स्तरमा कोभिड-19 फैलिरहेको अवस्थामा ठूलो संख्यामा नेपालीहरु पनि संक्रमित भएका होलान । कयौं नेपालीहरु हाम्रो सम्पर्कमा नआएका होलान । “
उहाँले 21 जना नेपालीहरु आफ्नो सम्पर्कमा आएको र त्यस मध्ये आफ्नो परामर्शमा 7 जना नेपालीहरु सञ्चो भएको र उनिहरु काममा पनि फर्किसकेको बताउनु भयो । अहिले 15 जना नेपालीहरु अझै कोरोना भाईरसका कारण संक्रमित भएको र उनिहरुमा खाशै लक्षण नभएको पनि उहाँले बताउनुभयो । विभिन्न माध्यमबाट कोरोना संक्रमितहरु सम्पर्कमा आउने गरेको र उनिहरुलाई उपचारसम्बन्धि परामर्शहरु दिइरहेको पनि बताउनुभयो ।
उहाँले नेपाल भारतमा कोरोना महामारीको वर्तमान स्थितिलाई हेर्दा डराउनुपर्ने आवश्यक्ता नभएको पनि बताउनुभएको छ । उहाँले प्रतिरक्षा प्रणाली राम्रो भएका मानिसहरु कोरोना भाईरस संक्रमणलाई जित्न सक्ने भएकाले भीडभाड भएका स्थानमा मास्कको प्रयोग, सामाजिक दूरीको पालना गर्दा यसबाट बच्न सकिने बताउनु भयो । उहाँले दीर्घ रोगीहरुले भने अहिलेको समयमा विशेष ख्याल राख्नुपर्ने सल्लाह पनि दिनुभएको छ । उहाँले पहिलेदेखिनै स्वास्थ्य समस्या भएकाहरुले भीडभाडबाट बच्नुपर्ने, सामाजिक दूरीको ख्याल गरि मास्क, सेनिटाइजरको प्रयोग गर्नुपर्ने बताउनु भएको छ ।
कोरोना भाईरसका कारण भारतमा 5 जना नेपालीको मृत्यु भइसकेको छ । त्यसमध्ये 2 जना चेन्नईमा, एक जना मुम्बईमा, एक जना दिल्लीको पहाडगँज र एकजना गुरुग्राममा नेपालीको मृत्यु भएको जानकारी पाइएको छ ।
