बैतडी, 8 जुलाई, हिम शाह
करिब 3 महिनापछि बुधबार खुलेको बैतडीको झुलाघाटबाट पेन्सन लिन भारत पुगेका एक नेपालीको मृत्यु भएको छ । करिब 3 महिनापछि सीमा खुलेकै दिन पेन्सन थाप्न पुगेका बैतडीको दशरथचन्द नगरपालिका–८ त्रिपुराका ८२ वर्षीय धनसिंह रावलको मृत्यु भएको हो ।
पेन्सन लिन भारतको झुलाघाटको बैङ्कका लाइनमा बसेकै बेला एक्कासि ढलेका रावलको उपचारको लागि अस्पताल लैजाँदै गर्दा मृत्यु भएको बैतडीका प्रहरी नायब निरीक्षक गौरीप्रसाद जैशीले जानकारी दिनुभएको छ।
जैशीका अनुसार मृतक रावल लामो समयदेखि दम र श्वासप्रश्वासका रोगी रहेको बुझिएको छ। कोरोना भएर पो मृत्यु भएको होईन भन्ने प्रश्नमा जैशीले मृतकको कोरोना परीक्षण भएपछि मात्रै थाहा लाग्ने बताउनुभएको छ । मृतक रावल भारतीय सेनाबाट सेवानिवृत्त रहेका थिए।
बुधबार नेपाल–भारत दुबै देशका जिल्ला प्रशासनको समन्वयमा झुलाघाट नाका खुला गर्ने सहमति भएपछि रावलसहित भारतीय पेन्सनधारी नेपाली नागरिकहरु झुलाघाट पुगेका थिए । सीमा नाका बुधबारदेखि शुक्रबारसम्म खुला रहने जिल्ला प्रशासन कार्यालय बैतडीले जनाएको छ ।
