काठमाण्डौं, 14 जुलाई 2020
प्रधानमन्त्री केपी शर्मा ओलीले भगवान रामको राज्य अयोध्या नेपालमा भएको भन्ने अभिव्यक्ति दिएपछि उहाँको बयानको विरोध नेपाल र भारतमा दुवै देशमा भइरहेको छ । यसै सन्दर्भमा सत्तारुढ दल नेपाल कम्युनिष्ट पार्टी (नेकपा) का नेता भीम रावलले पनि देशलाई गम्भीर असर पार्ने विषयमा पार्टी र सरकारमा कहीँ छलफल गर्नु नपर्ने कस्तो तन्त्र हो यो भन्दै प्रश्न गर्नुभएको छ ।
आज सामाजिक संजाल ट्वीटरमा ट्वीट गर्दै नेता रावलले यो बेला सीमा क्षेत्र मिचिएको, तराईका बस्ती डुबानमा परेको र कालापानी क्षेत्रबाट भारतीय फौज हटनुपर्ने विषयमा कुरा गर्नुपर्ने भए पनि राम र अयोध्याबारे बहस झिकेर विषयान्तर किन गरिएको भन्दै प्रश्न गर्नुभयो ।
रावलले भन्नुभयो, ‘सीमा क्षेत्र मिचिएको, तराईका बस्ती डुबानमा परेको एवं कालापानी क्षेत्रबाट भारतीय फौज हट्नु पर्ने विषय उठाई भारतसँग कुरा गर्नु पर्ने हो कि राम र अयोध्याबारे बहस गर्नुपर्ने हो ?’ भन्दै उनले ‘विषयान्तर किन ? देशलाई गम्भीर असर पार्ने विषयमा पार्टी र सरकार कहीँ छलफल गर्नु नपर्ने कस्तो तन्त्र हो ?’
सोमबार प्रधानमन्त्री केपी शर्मा ओलीले भारतले ‘नक्कली अयोध्या’ खडा गरेर सांस्कृतिक तथ्यमाथि अतिक्रमण गरेको बताएका थिए । नेपाल सांस्कृतिक हिसाबले थिचिएको उल्लेख गर्दै ओलीले तथ्यहरुमाथि भारतले अतिक्रमण गरेको बताएपछि अहिले उनको अभिव्यक्तिको सबैतिरबाट आलोचना भइरहेको छ।
