बर्दिया, 27 जुलाई/ हिम शाह
बर्दियाको ठाकुरबाबा नगरपालिकामा क्वारेन्टिनमा आत्महत्या गरेका अछामका युवकको कोरोना परीक्षण रिपोर्ट पोजेटिभ आएको छ। अछामको बन्निगढी गाउँपालिका घर भई बर्दिया ठाकुरबाबा नगरपालिका ४ सैनवार बस्ने रामबहादुर सावदले ठाकुरबाबा नगरपालिकाको क्वारेन्टिनमै आत्महत्या गरेका थिए।
क्वारेन्टिन पछाडिको रूखमा पासो लगाएर आत्महत्या गरेका उनको स्वाब पीसीआर परीक्षणका लागि पठाइएको थियो। आज सोमबार उनको रिपोर्ट पोजेटिभ आएको ठाकुरबाबाका प्रमुख प्रशासकीय अधिकृत रामहरि रिजालले जानकारी दिनुभयो। नेपाली सेनाको टोलीले उनको शव व्यवस्थापन गरेको छ।
युवक करिव 10 दिन अघि भारतको राजस्थानबाट महेन्द्रनगर हुँदै ठाकुरबाबामा आफन्त कहाँ पुगेका थिए। आफन्तले क्वारेन्टाईनमा बस्नुपर्ने भन्दै प्रहरीलाई खबर गरेपछि युवकलाई प्रहरीले 4 दिन अघि क्वारेन्टाईनमा लगेको थियो।
