नयाँ दिल्ली, 5 अगस्त 2020
भारतको अयोध्यामा राम मन्दीर निर्माणका लागि बुधवार शिलान्यास गरिएको छ । भारतका प्रधानमन्त्री नरेन्द्र मोदीले अयोध्यामा राम मन्दिर निर्माणको शिलान्यास गर्नुभएको हो । दिउँसो करीब पौने १ बजे मोदीले चाँदीका पाँच ओटा ईंटा राखेर मन्दिरको जग बसाल्नु भएको हो । अयोध्यामा राम जन्मभूमि बाबरी मस्जीद विवाद गत वर्ष 9 नोभेम्बरमा भारतको सर्वोच्च अदालतबाट सुल्झिएपछि श्रीरामको भव्य मन्दिर निर्माणका लागि शिलान्यास भएको हो । मुख्य समारोहका लागि भारतका प्रधानमन्त्री नरेन्द्र मोदी, उत्तर प्रदेशकी राज्यपाल आनन्दीबेन पटेल, मुख्यमन्त्री योगी आदित्यनाथसहित भारतका विभिन्न राज्यबाट विभिन्न समूदायका सन्त र नेपाल लगायत विभिन्न देशबाच सन्तहरु उपस्थित रहेका थिए । प्रधानमन्त्री मोदीले सबैभन्दा पहिला हनुमान गढ़ी मन्दिरमा दर्शन गरेपछि भगवान श्रीरामको मन्दिर निर्माणको जग बसाल्नप भएको हो । जानकारीका अनुसार मन्दिर निर्माणका लागि भारतका विभिन्न धार्मिक क्षेत्रसहित नेपालको जानकी मन्दिरबाट पनि चाँदीको ईट्टा र पवित्र नेपाली माटो राखिएको छ । भारतमा मन्दिर निर्माण शिलान्यास कार्यक्रमलाई ऐतिहासिक दिनका रुपमा मानिएको छ । यसैबिच भारत सरकारले प्रस्तावित राम मन्दिरको नक्सा पनि जारी गरेको छ ।
