नँया दिल्ली,11 अगस्त 2020
नेपाली जनसम्पर्क समिति भारतका अध्यक्ष बालकृष्ण पाण्डेले सरकारले कोरोना रोकथाममा आफ्नो विफलता लुकाउन भारतबाट गएकाहरुमाथि दोषारोपण गर्नु गलत भएको बताउनुभएको छ। नेपाली काँग्रेसका केन्द्रीय आमन्त्रीत सदस्य समेत रहनुभएका पाण्डेले सरकारले कोभिड-19 का लागि कुनै कार्ययोजनानै नबनाएर र आफ्नो आन्तरिक द्वन्दमा फसेर कोरोना व्यवस्थापन गर्न नसकेको अवस्थामा भारतबाट आएको कोरोना घातक र भारतबाट आएकाहरुले कोरोना फैलाए भन्नु जस्ता अभिव्यक्ति गलत भएको बताउनु भयो । भारतमा रहेका नेपालीहरु महामारीका क्रममा आफ्नो परिवारमा जान खोज्ने बाध्यतालाई बुझेर आफुहरुले शुरुवातदेखिनै उनिहरुलाई कोरोना जाँच गराएर स्वस्थ भएको अवस्थामा मात्रै नेपाल जान दिन पटक-पटक नेपाल सरकारलाई अपील गरेको तर सरकारको बेवास्ताका कारण कोरोना संक्रमण बढेको उहाँको भनाई छ।पाण्डेले प्रवासी नेपालीहरुकै साढे 6 अर्बभन्दा धेरै रकम नेपाल सरकारसँग रहेको भएपनि सरकारले त्यसको 5-10 प्रतिशत खर्च गरेर भारतमा रहेको नेपालीहरुलाई व्यवस्थित रुपले नेपाल पठाएको भए आज यो अवस्था नआउने बताउनुभयो । हरेक प्रकारका परिवर्तनमा भारतका नेपालीहरुको ठूलो योगदान रहने भएपनि सबैले खोला तरेर लौरो बिर्सिएको जस्तो गर्ने गरि प्रवासी नेपालीहरुलाई बिर्सने गरेको बताउनुभयो।
