चेन्नई, 22 अगस्त 2020
भारतको तमीलनाडु राज्यको चेन्नईमा कामको सिलसिलामा रहेका प्युठानका एक नेपालीले आत्महत्या गरेका छन । चेन्नईको सुङकुमारन स्ट्रीटमा अवस्थित “देवान मेस” मा 1 वर्षदेखि काम गर्दै आएका 46 वर्षका गीर बहादुर केसीले 21 अर्थात हिजो तीजको दिन साँझ पौने 4 बजे उनले पासो लगाएर आत्महत्या गरेको मूल प्रवाह अखिल भारत नेपाली एकता समाज दक्षिण भारत क्षेत्रीय समितिका अध्यक्ष महेन्द्र बस्यालले बताउनु भएको छ । उनले आत्महत्या गरेको कारण खुल्न सकेको छैन । उनको आफन्त अहिलेसम्म सम्पर्कमा नआएकाले पुलिसले मुद्धालाई अगाडी बढाउन सकेको छैन । यद्धपी घटनापछि मूल प्रवाहका क्षेत्रीय अध्यक्ष महेन्द्र बस्याल र पश्चिम नगर अध्यक्ष हेमराज रिजाल पुलिस स्टेशनमा गएर घटनाबारे जानकारी लिएका छन । तर पारिवार सम्पर्कमा नआएकाले पुलिसले अगाडीको कारवाही बढाउन नसकेकाले मूल प्रवाहले गीर बहादुरलाई चिन्नेले सम्पर्कमा आउन आग्रह गरेको छ ।
मृतक गीर बहादुरको साथबाट भेटिएको नागरिकता आधारमा उनि प्युठानको धरम्पानी गाविस वाड नं ९ का स्थायी वासिन्दा र यक बहादुर केसीका छोरा भएको थाहा भएको छ । यो घटनालाई चेन्नईको प्यारिसस्थित B-2 पुलिस स्टेशनले हेरिरहेको छ भने निजको पार्थिव शरीर राजीव गान्धी सरकारी हस्पिटलमा राखीएको छ।
मृतक गीर बहादुरबारे जानकारी भएको खण्डमा मोबाइल नम्बर 9444288256 मा खबर गर्न मूल प्रवाह अखिल भारत नेपाली एकता समाजका दक्षिण भारत क्षेत्रीय समितिका अध्यक्ष महेन्द्र बस्यालले आग्रह गर्नुभएको छ ।
असअघि यो घटनाको एकदिन अघि चेन्नईको प्यारिसमै काँस्की जिल्लाको रुपा गाँउपालिका वडा नम्बर 6 घर भएका अमृत केसीकी 36 वर्षीया श्रीमति अमृता केसीले पनि आत्महत्या गरेकी थिइन।
