कपीलवस्तु, 17 सेप्टेम्बर
नेपाल भारतको खुल्ला सीमाबाट ओहोर-दोहोर गर्ने नेपालीहरुले नेपाली सुरक्षाकर्मीबाटनै दुःख पाउने गरेको गुनासो गरेका छन । खासगरि नेपाल-भारत सीमाको कृष्णनगर नाकाबाट भारत आउदै गरेका नेपालीहरुबाट नेपाली सुरक्षाकर्मीहरुलेनै अवैध असुली गरिरहेका छन । नेपाल-भारत सीमाबाट अहिले भारतीय पहिचान पत्र भएका नेपालीहरुलाई मात्रै प्रवेश दिइएको छ । भारतीय सुरक्षा जाँचकर्मीहरुले भारतीय पहिचान पत्र वा आधार कार्ड भएका नेपालीहरुलाई सोधपुछपछि सहजै भारत आउन दिने भएपनि नेपाली सुरक्षाकर्मीहरुले रकम लिएर मात्र भारत आउन दिने गरेका छन । कयौं पटक नेपाली सुरक्षाकर्मीहरुले पैसा लिएर पनि घण्टौसम्म सीमामा कुराउने गरेको पीडित नेपालीले बताएका छन ।
एक पीडितले नाम नबताउने शर्तमा भने हामी 4 जना भारतीय पहिचान पत्र भएकाहरु भारत आउँदै थियौं । नेपाली सुरक्षाकर्मीले सीमामा रोकेर हामीसँग 5 / 5 सय रुपैया लिएर घण्टौ कुर्न लगाए । त्यसपछि हामीले आफ्नो पैसा फिर्ता लिएर खेतैखेतको चोर बाटोबाट सीमा काटेर रेलवे फाटकसम्म आएको र त्यसपछि बसमा सवार भएर राजस्थान पुग्यौ ।
यद्धपी आफुहरुलाई सीमा पार गरेपछि भारतीय सुरक्षाकर्मी एसएसबीले रोकेपनि सामान्य चेकजाँच र आइडी देखाएपछि आउन दिएको उनले बताए ।
तस्वीरमा देखाइएको भिडीयो कृष्णनगर सीमाको हो । भिडीयोमा नेपाली सुरक्षाकर्मीको दुःखले प्रताडित भएपछि कयौं नेपालीहरु चोर बाटोबाट सीमा पार गरि बस उभिएको ठाँउमा पुगिरहेका छन । लकडाउनका कारण घर गएका नेपालीहरु बेरोजगारीका कारण छाक टार्नका लागि भारत आउन बाध्य छन । तर सरकारले उनिहरुको आवत जावतलाई सहज गर्ने कुनै किसिमको पहल नगर्दा उनिहरु ज्यानकै जोखिम मोलेर भारत आउन बाध्य भएका छन ।
