कैलाली, 25 सेप्टेम्बर
कैलाली जिल्लाको अति दुर्गम मोहन्याल गाउँपालिकामा गत भदौ महिनामा गएको पहिरोमा पीडित बनेकाहरुलाई आर्थिक सहयोग गरिएको छ । आफ्नो क्षेत्रको विकासका लागि गठित भएको संस्था मोहन्याल गतिशिल युवा समाजले पहिरो पीडितहरुका लागि सहयोग संकलन गरि 11 घरधुरीका लागि 5/5 हजारका दरले 55 हजार आर्थिक सहयोग वितरण गरेको हो । गत भदौमा परेको अविरल वर्षाका कारण मोहन्याल गाउँपालिका वडा नं २ नारङ्गेमा गएको पहिरोले मानवीय क्षति नभएपनि ११ घरपरिवार विस्थापित भएका थिए । पीडितहरुलाई राहत उपलब्ध गराउन गतिशिल युवा समाजका सदस्यहरु निकै अफ्ठ्यारो बाटो, खोला नाला पार गरि करिब ३ दिनको यात्रा गर्दै घटनास्थल पुगेका थिए । समाजका तर्फबाट जनक सुनार, मनोज साउद, केशव माझी, प्रशान्त शाही, नारायण जैशी, हेमन्त धमला र पत्रकार चन्द्र खनाललगायतको टोली घटनास्थल पुगेको थियो । स्थानीय वीर बहादुर राना मगरका अनुसार पहिरोले घरहरु बगाउँदा लगभग एक करोड बराबरको क्षति भएको थियो । ठुलो क्षति भएपछि राहतको व्यवस्था गरिदिन स्थानीय पीडितहरुले अनुरोध गरेपछि समाज सहयोगका लागि अगाडी आएको हो । समाजले अभियानमा सहयोग गर्ने समाजसेवीहरु इशा गुरुङ, मिना ठकुरी, सबिना सिंहलगायतका सम्पुर्ण सहयोगीहरुप्रति आभार व्यक्त गरेको छ ।
