काठमाण्डौं,26 सेप्टेम्बर 2020
सहरी विकास राज्यमन्त्री रामबीर मानन्धरले कोभिड-१९ रोकथाम तथा नियन्त्रणका लागि सबै नागरिकले सरकारलाई सहयोग गर्नुपर्ने बताउनुभएको छ । शनिबार साधना कलाकेन्द्रले काठमाडौंमा आयोजना गरेको कार्यक्रमलाई सम्बोधन गर्दै राज्यमन्त्री मानन्धरले सबै जनताको सहयोग भए मात्रै सरकारले कोभिड-१९ रोकथाम तथा नियन्त्रणका लागि प्रभावकारी काम गर्न सक्ने बताउनुभएको हो । उहाँले अहिले सरकारले गरेका कामहरुप्रति सबैले आलोचना मात्रै गरिरहेकाले पनि समस्या देखिएको बताउनुभयो। करिब १० लाख मानिसहरुको पीसीआर परीक्षण गर्दा नै अर्बौं रुपैयाँ सकिएको तर नियन्त्रणमा आउन नसकेकोले सबैको सहयोगको आवस्यकता रहेको उहाँको भनाई छ । कार्यक्रममा राज्यमन्त्री मानन्धरले कलाकारिता क्षेत्रको विकासको पहिलो अधार एक श्रष्टाले अर्को श्रष्टालाई सम्मान गर्नु नै रहेको बताउनुभयो । श्रष्टा प्रतिको सम्मान नै कलाकारिताको पहिलो साधना भएको पनि उहाँले बताउनुभयो ।
कार्यक्रममा राज्यमन्त्री मानन्धरले साधना कला केन्द्रले अनलाइन मार्फत आयोजना गरेको गायन प्रतियोगिताका विजेताहरुलाई पुरस्कृत गर्नुभएको छ। जसमध्ये प्रथम पुरस्कार ललितपुरकी कलाकार रुपा सापकोटाले प्राप्त गर्नुभएको छ । दोस्रो पुरस्कार दोलखाकी ममता तामाङ, तेस्रो पुरस्कार विराटनगरका डा. मन्जिल श्रेष्ठ र सान्त्वना पुरस्कार काठमाडौंका विमल रुचाल र निषादरत्न तुलाधरले प्राप्त गर्नुभएको छ। साधना कलाकेन्द्रले आयोजना गरेको गायन प्रतियोगितामा अनलाइन माध्यमबाट विभिन्न १३ देशमा रहेका कलाकारहरुले सहभागिता जनाएका थिए
