जापान, 2 अक्टोबर, नुना कुँवर
कोरोना महामारीका कारण रोकिएको जापान प्रवेश खुल्ला भएको छ । जापानको कानून मन्त्रालयले बिहीबार एक सूचना जारी गर्दै 9 अक्टोबरदेखि जापान प्रवेश खुल्ला भएको जनाएको छ । मन्त्रालयले पर्यटक भिसा बाहेक विद्यार्थी, कामदार र डिपेन्डेन्टहरुका लागि प्रवेश खुल्ला गरेको छ । यसका साथै जापान प्रवेश गर्नेहरुका लागि विभिन्न मापदण्डहरु पनि तोकिएको छ । जापान जान चाहनेहरुले कोरोना नियन्त्रणका लागि जारि गरिएका दिशा निर्देशहरुलाई अनिवार्य रुपमा पालना गर्नु पर्नेछ । त्यसका साथै विद्यार्थीहरुको हकमा विद्यालय वा कलेज, कामदारको हकमा कम्पनी र डिपेन्डेन्टको हकमा आफन्तले जिम्मा लिनुपर्नेछ । जापानबाट यही अगस्त 31 भन्दा पहिले गएकाहरुले भने अनिवार्य रुपमा समबन्धित देशमा रहेको जापानी दूतावासबाट पुनः प्रवेश अनुमतिलाई प्रमाणित गराउनुपर्नेछ । तर 9 सेप्टेम्बरपछि जापान छोडेकाहरुले भने दूतावास जानुपर्ने आवश्यक्ता नरहेको जनाइएको छ । पर्यटक भिसामा भने प्रतिवन्ध यथावत राखिएको छ ।
