पटना, 28 अक्टोबर 2020
भारतको बिहार राज्यमा विधानसभा चुनाव अन्तर्गत बुधबार पहिलो चरणको मतदान भइरहेको छ । राज्यका 16 जिल्लाको 71 सीटका लागि आज मतदान भइरहेको छ । 71 सीट मध्ये 35 सीट माओवादी प्रभावित क्षेत्र हो । दिँउसो 1 बजेसम्म लगभग 33 प्रतिशत भोट खसेको चुनाव आयोगले बताएको छ ।
पहिलो चरणमा ७१ पदका लागि एक हजार ६६ जना उम्मेदवार चुनावी मैदानमा रहेको निर्वाचन आयोगले जनाएको छ । ती मध्ये ९५२ जना पुरुष र १५५ जना महिला रहेका छन् । बुधबार मतदान भइरहेको क्षेत्रमा कूल दुई करोड १४ लाख ८४ हजार ७८७ जना वैध मतदाता रहेका छन् ।
बिहानै 7 बजेदेखि भइरहेको मतदान साँझ 6 बजेसम्म चल्नेछ । मतदानमा कोरोना भाइरसबाट जोगिन मतदाताहरुलाई आधारभूत मापदण्डहरु अपनाउन आह्वान गरिएको छ । निर्वाचन सम्पन्न गराउन ७८ हजार ६९१ जना निर्वाचन कर्मचारी खटिएका छन् । मतदानका बेला अपनाउनु पर्ने मापदण्डका बारेमा निर्वाचन आयोगले निर्देशिका नै बनाएर जारी गरेको छ । मापदण्डमा विद्युतीय मतदान यन्त्रलाई सेनिटाइज गर्नु पर्ने, सबैले मास्कको प्रयोग गर्नुपर्ने, प्रतिरक्षात्मक अन्य साधनहरुको प्रयोग गर्नुपर्ने, सेनिटाइजर, साबुन र पानी सबैलाई पर्याप्त उपलब्ध गराउनु पर्ने, सामाजिक दूरी कायम गर्नुपर्ने लगायतका कुरा उल्लेख गरिएको छ ।
243 सदस्यीय बिहार विधानसभाका लागि तीन चरणमा मतदान भइरहेको छ । 3 नोभेम्बरमा हुने दोस्रो चरणमा 94 सीट र 7 नोभेम्बरमा हुने तेस्रो चरणमा 78 सीटमा मतदान हुनेछ । मतगणना भने 10 नोभेम्बरमा हुनेछ ।
