दिल्ली, 19 नोवेम्बर 2020
भारतको राजधानी दिल्लीमा कोभिड-19 को तेस्रो लहर छाएको छ। दिल्लीमा पछिल्लो 15 दिनमै 1 लाख नयाँ संक्रमित थपिएका छन । यस दौरान 1 हजार 2 सय 2 जनाको मृत्यु भएको छ । दिल्लीमा हिजोमात्र 7 हजार 4 सय 86 नयाँ संक्रमित भएका छन । दिल्लीमा अहिलेसम्म संक्रमित हुनेको संख्या 5 लाख 3 हजार 84 पुगेको छ। हिजो एकैदिनमा दिल्लीमा अहिलेसम्मकै सर्वाधिक 131 जनाको कोभिड-19 का कारण मृत्यु भएको छ । अहिलेसम्म ज्यान गुमाउनेको संख्या 7 हजार 9 सय 43 पुगेको छ । योसँगै दिल्ली भारतमा सबैभन्दा धेरै संक्रमण फैलिएको राज्य बनेको छ । यसअघि महाराष्ट्र राज्य महामारीले सबैभन्दा धेरै प्रभावित राज्य थियो । यद्धपी कोरोनाले धेरै मृत्यु भने दिल्लीभन्दा धेरै महाराष्ट्रमै छ। महाराष्ट्रमा यस भाईरसबाट अहिलेसम्म 10 हजार 6 सय 15 जनाको मृत्यु भएको छ । दिल्लीका मुख्यमन्त्री अरविन्द केजरीवालले चाडपर्वका क्रममा मानिसहरुले बजार पसलमा किनमेलका क्रममा भिडभाड गरेकाले दिल्लीमा कोरोना महामारी बढेको बताउनु भएको छ। दिल्ली सरकारले कोरोना महामारी रोकथामका लागि कयौं प्रतिवन्धहरुमा कडाई गरेको छ। दिल्लीका भिडभाड हुने बजार क्षेत्रमा फेरि लकडाउन गर्ने तयारी गरिएको छ भने वैवाहिक समारोहमा 2 सय जनासम्म भेला हुन छूट दिइएकोमा अब फेरि 50 जनासम्म मात्रै भेला हुन अनुमति दिइएको छ । सार्वजनिक स्थलमा छठ पर्व मनाउन प्रतिवन्ध गरिएको छ । यसअघि दिल्लीको यमुना नदिमा छठ पर्व मनाउन निकै भिडभाड हुने गर्थ्यो । भारतमा लकडाउनपछि सबैभन्दा पहिले अब महामारीसँगै जिउन सिक्नुपर्छ भन्दै लकडाउन खुकुलो पार्ने राज्य दिल्ली हो । दिल्लीमा महामारी निकै बढेपछि दिल्ली सरकार फेरि नियन्त्रण तथा रोकथामका काममा केन्द्रीत भएको छ ।
