नयाँ दिल्ली, 12 जनवरी 2021
भारतका विभिन्न शहरहरुमा आगामी 16 जनवरीदेखि कोभिड-19 खोप अभियान शुरु हुँदैछ । सबै स्थानमा सुचारु ढंगले खोप अभियान चलाउन भन्दै आजदेखि कयौं राज्य र केन्द्र शासित प्रदेशहरुमा कडा सुरक्षाका बिच पुणेस्थित सिरम इन्स्टीच्यूट अफ इण्डियाले विकसित गरेको कोभेक्सीन खोप पुऱ्याउन शुरु गरिएको छ । सरकारले कोभिड-19 को पहिलो खेप पुणेबाट दिल्ली, चेन्नई, कोलकाता, गुवाहाटी, शिलोङ, अहमदाबाद, हैदराबाद, विजयवाड़ा, भुवनेश्वर, पटना, बेंगलुरू, लखनऊ र चंडीगढ़ लगायतका स्थान पठाइएको छ । आज एयरइंडिया, स्पाइसजेट, गो-एयर र इंडिगो लगायतका 9 उडानबाट साढ़े छप्पन लाख खुराक पठाइएको नागरिक उड्डनमन्त्री हरदीप सिंप पुरीले बताउनुभयो । जानकारीका अनुसार भारत सरकारले सिरम इन्स्टीच्यूटबाट खोपको 1 करोड 1 लाख खुराक अर्डर गरेको छ । यी खोपहरुलाई देशका विभिन्न 60 स्थानमा पुऱ्याइएपछि लगाउन शुरु हुनेछ । पहिलो चरणमा 3 करोड डाक्टर, स्वास्थ्यकर्मी र सफाईकर्मी लगायत अग्रपंक्तीमा काम गर्ने व्यक्तिहरुलाई खोप दिइनेछ भने यसको सम्पूर्ण खर्च केन्द्र सरकारले बेहोर्ने प्रधानमन्त्री नरेन्द्र मोदीले बताउनु भएको छ । त्यसपछि दोस्रो चरणमा 50 वर्षमाथिका र कुनै पनि रोगले ग्रस्त नागरिकलाई र त्यसपछि आवश्यक भएकाहरुलाई खोप लगाइनेछ । यो खोप 28 दिनको अन्तरालमा 2 चरणमा मानिसहरुले लगाउने पर्नेछ भने दोस्रो खोप लगाएको 2 हप्तापछि खोपले शरीरमा प्रतिरक्षात्मक एन्टीबडी बनाउनेछ । भारत सरकारले खोप लगाउनु स्वेच्छिक भएको बताएपनि रोगबाट आफु र आफ्नो परिवारलाई बचाउनुका साथै यसलाई फैलनबाट रोक्न खोप लगाउन सुझाव दिएको छ ।
