नयाँ दिल्ली, 15 जनवरी 2021 नेपाल–भारत परराष्ट्रमन्त्रीस्तरीय संयुक्त आयोगको बैठक नयाँदिल्लीमा शुरु भएको छ । हैदरावाद हाउसमा जारी बैठकमा नेपाल–भारत द्विपक्षीय सम्बन्धका साथै व्यापार, ऊर्जा, पारवहन, कोभिड–१९ सहकार्य, पूर्वाधार, कनेक्टिभिटी, लगानी, कृषि, पर्यटन लगायतका विषयमा छलफल हुनेछ ।
बैठकअघि परराष्ट्रमन्त्री प्रदीप कुमार ज्ञवालीले विहान भारतीय समकक्षी एस जयशंकरसँग भेटवार्ता गर्नु भएको थियो ।
परराष्ट्रमन्त्री ज्ञवाली भारतमा जानुभन्दा अगाडि परराष्ट्र मन्त्रालयले जारी गरेको विज्ञप्तिमा सीमासम्बन्धी विषयमा पनि बैठकमा छलफल हुने उल्लेख थियो । तर भारतले सीमा सम्बन्धी विषयमा छलफल नगर्ने संकेत गरेको छ । बैठकको पूर्वसन्ध्यामा आयोजित पत्रकार सम्मेलनमा भारतीय विदेश मन्त्रालयका प्रवक्ता अनुराग श्रीवास्तवले ‘सीमा विवादबारे संयुक्त आयोगको बैठकमा छलफल नहुने बताउनु भएको थियो ।
नेपाल–भारत परराष्ट्रमन्त्रीस्तरीय संयुक्त आयोगको बैठकमा सहभागी हुन दिल्ली पुग्नु भएका परराष्ट्र मन्त्रीले बिहीबार नेपाली राज्दूतावासमा प्रवासी नेपालीहरुसित भेट गर्नु भएको थियो । उहाँ शनिबार स्वदेश फर्किने कार्यक्रम छ ।
