काठमाण्डौ, 23 मार्च 2021
नेपाल कम्युनिष्ट पार्टी (एमाले)का वरिष्ठ नेता माधव कुमार नेपालले अध्यक्ष ओलीसँग आत्मसमर्पण नगर्ने बताउनुभएको छ । मंगलबार नेपाल पक्षको अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु)ले काठमाडौंमा आयोजना गरेको राष्ट्रिय कार्यकर्ता भेलालाई सम्बोधन गर्दै नेता नेपालले अध्यक्ष ओलीले सोधेको स्पष्टिकरणको जवाफ दिएर आत्मसमर्पण नगर्ने बताउनुभएको हो । उहाँले स्पष्टिकरणबाट आफूहरु नतर्सेको समेत बताउनुभयो ।
उहाँले भन्नुभयो ‘आज एकजनाले विनम्र भावले भन्दै हुनुहुन्थ्यो केपी ओलीसँग मिल्नका लागि के गर्नुप¥यो भने उहाँले जेजे कारबाही गर्नुहुन्छ सहेर भएपनि, पार्टीबाट निकालि दिनुहुन्छ भनेपनि पार्टीबाट निकालिएपनि चुप लागेर सहेर बसिदिनुहोस । के त्यही बाटोमा हामी जाने हो ? के घुडा टेक्ने बाटोमा हामी जाने हो ? हामी के आत्मसमर्पणको बाटोमा जाने हो ? के केपी ओलीको टाङमुनी छिर्ने बाटोमा जाने हो ? यो कुरा हामीलाई किमार्थ मन्जुर छैन । त्यसो हुनाले केपी ओलीको यो कथित स्पष्टिकरणबाट हामी तर्सिएका छैनौं । हामी आतंकित भएका छैनौं । त्यसको सामना गर्न तयार छौं ।’
ओली पक्षले सोधेको स्पष्टिकरणबाट भागेर मैदान नछाडने र पार्टी नफुटाउने पनि नेता नेपालले बताउनुभयो । अध्यक्ष ओली पार्टी विभाजनको पक्षमा रहेपनि आफूले पार्टी नफुटाउने स्पष्ट पार्नुभयो ।
उहाँले भन्नुभयो ‘ मलाई एकजनाले भन्नुहुन्थ्यो स्टेजमा बस्दाखेरी अनुहार उज्यालो गर्नुहोस, अलि अध्यारो अध्यारो जस्तो भयो मुसुक्क हासिदिनुहोस, म हाँस्ने प्रयत्न गर्दैथिए तपाईहरुमा अलिकता पनि नपरोस कि हामी तर्सेका छौं, केपी ओलीको स्पष्टिकरणबाट तर्सेका छैनौं । हामी मैदान छोडेर भाग्नेवाला छैनौं, पार्टी हामी फुटाउँदैनौं । पार्टी फुटाउने केपी होली हुन् । पार्टी फुटाउँछन भने ओलीले फुटाउँछन्, हामीले फुटाउँदैनौं । पार्टीलाई एकतावद्ध बनाउछौं ।’
आफू कहिले अलमलमा र द्धिविधामा नपरेको पनि नेता नेपालले स्पष्ट पार्नुभएको छ । आफूले चुनौतिको सामना गर्दै अगाडि बढ्ने बताउनुभयो ।
उहाँले भन्नुभयो ‘कस्ता कस्ता कहाँ आए केपी ओली मेरो समुन्नेमा’ । केपी ओलीको अहिलेको चुरिफुरी प्रधानमन्त्रीको कुर्चिमा बस्दासम्म मात्रै हुने पनि नेता नेपालले बताउनुभयो ।
नेता नेपालले नेकपा एमाले आफूहरुको भएको पनि बताउनुभयो । केपी ओली बि-माले, सि-माले भएकाले पार्टी छोडेर गए हुने टिप्पणी गर्नुभयो ।
उहाँले भन्नुभयो ‘नेकपा एमाले हाम्रो हो । केपी ओलीको होइन । अब केपी ओलीले जालझेल गरेर कानूनी हिसाबले कब्जा गरे भने विचार गरौंला होइन भने नेकपा एमाले हाम्रो हो । केपी ओली बि-माले हुन, सि-माले हुन उनी यो पार्टी छोडेर गए हुन्छ ।’
केपी ओली र आफूहरुको बीचमा प्रवृति र विचारको लडाई भएको पनि नेता नेपालले बताउनुभयो। ओलीमा व्यक्तवादी प्रवृति रहेको र आफू जहिले सङ्गठनलाई केन्द्रमा राखेर सोच्ने गरेको बताउनुभयो ।
उहाँले भन्नुभयो ‘हाम्रो प्रवृति सामुहिकतावादी छ । आफूलाई व्यक्तिवादी, आफुलाई केन्द्रमा राखेर चल्ने प्रवृति केपी ओलीमा छ । हामीले सङ्गठनलाई केन्द्रविन्दुमा राखेर चल्ने कुरालाई प्रोत्साहित गर्दछौं । हामीमा त्यो सङ्गठनवादी प्रवृति रहेको छ ।’
