काठमाण्डौ, 2 अप्रील 2021
राष्ट्रपति विद्यादेवी भण्डारीले सरकारको दृढ इच्छाशक्ति र तत्परताका कारण मेलम्चीको पानी काठमाडौंमा आइपुगेको बताउनुभएको छ। शुक्रबार मेलम्ची खानेपानी आयोजनाको खानेपानी वितरण कार्यको समुद्घाटन गर्दै राष्ट्रपति भण्डारीले केपी शर्मा ओली नेतृत्वको सरकारको दृढ इच्छा शक्ति र तत्परताको कारण मेलम्ची खानेपानी आयोजना सम्पन्न भएको बताउनुभएको हो। नयाँ वर्ष २०७८ सालको पूर्वसन्ध्यामा मेलम्ची खानेपानी आयोजना काठमाडौंबासीलाई उपहार हुन पुगेको पनि बताउनुभयो । राष्ट्रपति भण्डारीले मेलम्चीको खानेपानी काठमाडौं ल्याउन परिकल्पना गर्ने पूर्व प्रधानमन्त्री कृष्णप्रसाद भट्टराईलाई पनि स्मरण गर्नुभएको छ ।
राष्ट्रपति भण्डारीले मेलम्ची खानेपानी आयोजनामा हासिल गरेका सिकाइबाट शिक्षा लिदैँ आगामी दिनमा ठुला पूर्वाधारहरुको तर्जुमा गर्न सबै पक्ष सचेत बन्नुपर्ने आवश्यकता रहेको पनि बताउनुभयो । कार्यक्रममा बोल्दै प्रधानमन्त्री केपी शर्मा ओलीले काठमाडौंमा खानेपानीको क्षमतालाई बढाउन याङ्ग्री र लार्केको पानी २०८१ सालसम्ममा ल्याउने बताउनुभयो ।
प्रधानमन्त्री ओलीले पुनस्थापित संसदले काम गर्न नसकेको र संसदलाई तानातानको थलो बनाइएको टिप्पणी समेत गर्नुभयो । संसदलाई दलका व्यक्तिहरुको स्वार्थमा तानातानको थलो बनाउनु नहुने बताउनुभयो ।
