नयाँ दिल्ली, 9 मई 2021

भारतको राजधानी दिल्लीमा कोरोना संक्रमणका कारण थप एक नेपालीको मृत्यु भएको छ । दिल्लीको ग्रीन पार्क क्षेत्रमा कोठीमा काम गर्दै आएका अर्घाँखाँची जिल्लाको सन्धिखर्क नगरपालिका वडा नम्बर 8 खापडाँडाका 28 वर्षीय कृष्ण बिकको कोरोना संक्रमणका कारण शनिवार राति रेवाडीस्थित अस्पतालमा निधन भएको उनका गाँउले नारायण शर्माले बताउनुभयो । पछिल्लो केहीदिन देखि कोभिड संक्रमित हुनु भएका कृष्णलाई अफ्ठ्यारो भएपछि पछिल्लो एक सातादेखि रेवाडी अस्पतालमा भर्ना गरिएको नारायण शर्माले बताउनु भयो । हिजोसम्म अवस्था ठीकै भएपनि हिजो भेन्टिलेटरमा राखेर उपचार चलिरहेका बेला सास लिन अप्ठ्यारो भएपछि राति 10 बजेतिर निधन भएको नारायण शर्माले बताउनुभयो । उनि झण्डै 12 वर्षदेखि ग्रीन पार्कस्थित कोठीमा काम गर्दै आएका थिए । अरुलाई पर्दा सहयोग गर्ने कृष्ण बिकको उपचारमा कोठीका मालिक, उनका दाई र नारायण शर्माले नीजी अस्पतालमा राम्रो भन्दा राम्रो उपचार गराउने प्रयास गरेका थिए । तर अफसोस हिजो राति उनको निधन भएको हो ।