काठमाण्डौ, 21 मे 2021
नयाँ सरकारका लागि विपक्षी गठबन्धनले नेपाली काँग्रेसका सभापति शेरबहादुर देउबालाई प्रधानमन्त्री बनाउने निर्णय गरेको छ । कांग्रेस संसदीय दलको कार्यालय सिंहदरबारमा बसेको विपक्षी गठबन्धनको बैठकले देउवालाई प्रधानमन्त्रीमा प्रस्ताव गर्ने निर्णय गरेको कांँग्रेस नेता गगन थापाले जानकारी दिनुभयो। शेर बहादुर देउबालाई प्रधानमन्त्री बनाउन 149 जना सांसदले हस्ताक्षर गरेका छन् । नेपाली कांग्रेस, माओवादी केन्द्र, एमालेको माधव नेपाल पक्ष र जसपाको बाबुराम–उपेन्द्र पक्षका 149 सांसदकाे हस्ताक्षर सङ्कलन भएको छ ।
सङ्कलित हस्ताक्षर लिएर कांग्रेस सभापति देउवा र माओवादी केन्द्रका अध्यक्ष प्रचण्ड राष्ट्रपति विद्यादेवी भण्डारीलाई बुझाउन शीतल निवास पुग्दै हुनुहुन्छ । नयाँ सरकार गठनका लागि एक सय ३६ सांसदको आवश्यकता पर्छ । विपक्षी गठबन्धनले आफिहरुसँग 149 सांसद रहेको बताएको छ। यसमा कांग्रेसको 61, माओवादी 48, नेकपा (एमाले) माधवकुमार नेपाल पक्षको 27 र जसपा उपेन्द्र यादव पक्षको 13 सांसद रहेको काँग्रेस नेता गगन थापाले बताउनु भएको छ ।
