इलाम, 21 सितम्बर 2021
घरसँगै जलेर दम्पतीको मृत्यु भएको छ। इलाम नगरपालिका–५, बरबोटे घर भएपनि झापाको अर्जुनधारा बस्दैआएका ४५ वर्षे रोम खनाल र उनकी श्रीमती ४३ वर्षीया दुर्गाको गएराति उपचारक्रममा मृत्यु भएको हो। गत भदौ २६ गते साँझ खाना पकाउने ग्याँस सिलिन्डर लिक भएर विस्फोट हुँदा घरमा आगो लागिएको थियो। आगोले खनाल दम्पतीसहित रोमकी आमा ८५ वर्षीया मंगलादेवी र छोरा १८ वर्षे पंकजसमेत घाइते भएका थिए। काठमाडौंस्थित कीर्तिपुर अस्पतालमा उपचाररत गम्भीर घाइते रोमको गएराति पौने ८ र दुर्गाको ११ बजे निधन भएको दुर्गाका भाइले जनाए । सामान्य घाइते पंकजको त्यही अस्पतालमा उपचार हुँदैछ र मंगलादेवीको झापामै उपचार भइरहेको छ। रोम र दुर्गाकी छोरी, घटनाका बेला घरबाहिर रहेकाले बच्न सफल भएकी छिन्। खनाल दम्पतीलाई आगोले जलेर घाइते भएपछि उपचारका लागि विराटनगर लगिएको थियो। तर, त्यहाँ उपचार सम्भव नभएपछि भदौ २८ मा काठमाडौं पुर्याएको थियो। आर्थिक अवस्था कमजोर रहेका खनाल दम्पतीको उपचारमा करिब ८ लाख रुपैयाँ खर्च भइसकेको अस्पतालमै रहेका ढकालले बताए। आगोले घर जलेर पूर्णरूपमा नष्ट भएको छ।
