काठमाडौं, 3 अक्टुबर 2021
इपिएस परीक्षा पास गरेर प्रक्रिया पुरा गरेका ५० जना नेपाली कामदार आगामी अक्टुबर २७ तारिकमा दक्षिण कोरिया जाने भएका छन् । सिंहदरबारमा आइतबार बसेको राष्ट्रिय सभा अन्तर्गतको प्रत्यायोजित व्यवस्थापन तथा सरकारी आश्वासन समितिको बैठकमा श्रम, रोजगार तथा सामाजिक सुरक्षा मन्त्रालयका सचिव सूर्यप्रसाद गौतमले सरकारले दक्षिण कोरियामा कामदार पठाउने प्रक्रिया सुरु गरेको र पहिलो चरणमा ५० जना नेपाली कामदार आगामी अक्टुबर २७ तारिकमा त्यसतर्फ प्रस्थान गर्ने जानकारी दिनुभयो । उहाँले ११९ जना मध्ये पहिलो चरणमा ५० जनालाई पठाइने र अन्यको भिसा प्रक्रिया सुरु गरिने बताउनुभयो । कोरिया जाने कामदारको क्वारेन्टाइन र बिमाका बारेमा देखिएको समस्या समाधान भइरहेको उहाँले बताउनुभयो । प्रक्रिया पुरा गरेर बसेका अन्य कामदारको हकमा कोरियाबाट नाम सहितको पत्र आएपछि पुन पठाउन सुरु गरिने उहाँको भनाई छ । बैठकमा मुख्य सचिव शंकरदास बैरागीले कोरीया जानका लागि अहिले कोरियन एयरलाईन्सको मात्र सिधा उडान रहेकोमा निकै महङ्गो पर्ने देखिएको बताउनुभयो । कामदार आफैले टिकट काटेर जाँदा लागत चार गुणासम्म महङ्गो पर्न जाने देखिएको उहाँले बताउनुभयो । बैठकमा समिति सदस्यहरुले इपिएस परीक्षा पास गरेका कामदारहरुलाई समेत दक्षिण कोरिया पठाउने काममा ढिलाई नगर्न सरकारको ध्यानाकर्षण गराएका थिए । यसअघि इपिएस परीक्षा पास गरेर बसेका करिब १० हजार कामदारहरुले दक्षिण कोरिया पठाउने काममा सरकारले आलटाल गरेको भन्दै समितिमा उजुरी परेपछि समितिले चासो देखाएको थियो ।
