काठमाडौं, 8 अक्तूबर 2021
दोस्रो राष्ट्रिय नवदुर्गा सम्मान–२०७८ बाट नौ जना कलाकार सम्मानित भएका छन् । बिहीबार काठमाडौंमा रेजिना इन्टरटेन्मेन्ट तथा शहिद फिल्म्स प्रालिले संयुक्त रुपमा आयोजना गरेको कार्यक्रममा नेपाली फिल्मका नौ जना अभिनेत्रीहरुलाई नवदुर्गा सम्मानद्वारा सम्मानित गरिएको हो ।
सम्मानित हुने अभिनेत्रीहरुमा चैत्य देवी, शर्मिला मल्ल, लक्ष्मी गिरी, मौसमी मल्ल, नीता ढुंगाना, केकी अधिकारी, सुरक्षा पन्त, साम्राज्ञी राज्य लक्ष्मी शाह तथा उपासना सिंह ठकुरी रहनुभएको छ । उहाँहरुलाई उर्जामन्त्री पम्फा भुसालले सम्मान गर्नुभयो । कार्यक्रममा ऊर्जामन्त्री भुसालले समाज रुपान्तरणमा कलाकारहरुको भूमिका महत्वपूर्ण हुने बताउनुभयो । उहाले कोरोनाका कारण सर्वसाधारणको अवस्था असहज भएकाले सरकारले राहतका कार्यक्रम ल्याएको उल्लेख गर्नुभयो । मन्त्री भुसालले कलाकारको समस्या समाधान गर्न र सहयोग गर्न सकारात्मक रहेको धारणा राख्नुभयो । दुई वर्ष प्रारम्भ भएको राष्ट्रिय नवदुर्गा सम्मान गत वर्ष भने कोभिड–१९ को जोमिखका कारण आयोजना भएको थिएन । यसपटकको नवदुर्गा सम्मान कार्यक्रमलाई स्वास्थ्य सुरक्षाको मापदण्ड अपनाएर आयोजना गरिएको आयोजकले जनाएको छ ।
