काठमाडौं, 21 अक्तूबर 2021
अविरल वर्षा पछि आएको बाढीपहिरो र डुबानबाट आज बिहानसम्ममा मुलुकका विभिन्न जिल्लामा ८८ जनाको मृत्यु भएको गृह मन्त्रालयले जनाएको छ। मन्त्रालयको विपद् व्यवस्थापन महाशाखाका अनुसार कूल ३० जना बेपत्ता भएका छन् भने अधिकांशको पहिराका कारण ज्यान गएको हो। आजमात्रै ११ जनाको मृत्यु पुष्टि भएको छ। विपद्मा परेर पाँचथरमा मात्रै सबैभन्दा बढी २७ जनाको मृत्यु भएको छ। इलाम र डोटीमा १३/१३ जनाको मृत्यु भएको छ। यस्तै कालीकोट, बैतडी, डडेलधुरा, बझाङ, हुम्ला, सोलुखुम्बु, प्युठान, धनकुटा, मोरङ, सुनसरी, उदयपुरलगायत १५ जिल्लामा मानवीय क्षति भएको महाशाखाका प्रमुखले जनाए। २० जिल्ला विपद्बाट प्रभावित भएको छ। बझाङमा सबैभन्दा बढी २१ जना हराएका छन्। पाँचथरमा चारसहित विभिन्न जिल्लामा गरेर ३० बेपत्ता रहेको गृहमन्त्रालयले बताएको छ।
