काठमाडौं, 16 नवम्बर 2021
नेत्रविक्रम चन्द ‘विप्लव’ नेतृत्वको नेपाल कम्युनिस्ट पार्टीले आह्वान गरेको नेपाल बन्दका कारण काठमाडौंका सडकमा आशिंक प्रभाव परेको छ । विप्लव नेतृत्वको नेकपाले पेट्रोलियम पदार्थमा भएको मूल्यवृद्धि फिर्ताको माग गर्दै आज नेपाल बन्द गरेको हो । विहानैदेखि काठमाडौंमा नेपाल बन्दका कारण सार्वजनिक सवारीहरु एकदम कम चलेका छन् भने शाखा रोडहरूमा भने सुनसान छ । बिहानै काममा हिडेका यात्रुहरू अलपत्र परेका छन् । सवारीसाधन नहुने सर्वसाधारणहरू हिँडेरै कार्यस्थल पुगेका छन् भने कतिपय निजी सवारी साधनहरू फ्याट्टफुट्ट चलेका छन् । बिहानै यात्रुले सास्ती भोगेका छन् । सार्वजनिक गाडी कुरेर बसे पनि पाउन सकेका छैनन् । विभिन्न जिल्लाबाट काठमाडौं आइपुगेका यात्रुहरु पनि विभिन्न ठाउँमा अलपत्र परेका छन् । कलंकी, नयाँबसपार्क, कोटेश्वर, बल्खु, बालाजुलगायतका स्थानमा यात्रुहरू गाडी कुरिरहेका देखिन्छन् । अन्य चोकहरूमा पनि प्रहरीको उपस्थिति बाक्लो छ । प्रहरीले फाट्टफुट्ट सार्वजनिक गाडी चलिरहेको पनि जनाएको छ । सार्वजनिक गाडीको सङ्ख्या कम भए पनि निजी गाडी र मोटरसाइकल भने सामान्य रुपमा चलिरहेका छन् ।
