काठमाडौं, 24 नवम्बर 2021
नेकपा एमालेका अध्यक्ष केपी ओलीले एमालेले अब कुनै पार्टीसंग एकता नगर्ने स्पष्ट पार्नुभएको छ । बुधबार काठमाडौंमा युवा संघ अन्तर्गतको साइबर सर्कल घोषणा कार्यक्रममा ओलीले एमालेले एकता गर्नुपर्ने कुनै पार्टी नरहेको भन्दै अरु पार्टीमा रहेकाहरु एमालेमा भने आउन सक्ने बताउनुभएको हो । उहाँले माधव नेपालमा गएका नेताहरुलाई एमालेमा नै फर्कन पनि आग्रह गर्नुभयो । अध्यक्ष ओलीले कांग्रेसको पुच्छर समातेर धेरै फुर्ति नलगाउन माधव नेपाललाई चुनौति दिनुभयो । उहाँले एमाले विगार्न नसकेर कांग्रेसलाई बिगार्न प्रचण्ड लागिपरेको भन्दै सजक रहन कांग्रेसलाई सुझाव दिनुभयो । अदालतको फैसलाबाट जनमतलाई पराजित गरेको भ्रम केहिले पालेको भन्दै उहाँले जनताले जित्नेकी जनविरोधीहरुले जित्ने निर्णय हुन बाँकी रहेको तर्क गर्नुभयो । उहाँले एमाले भनेको पार्टीको नाममात्र नभएर नेपाली जनताको प्रतिनिधि शक्ति भएको दावी गर्नुभयो । अध्यक्ष ओलीले पाँच दल कै कारण अदालतमा समस्या देखिएको बताउनुभयो । सर्वोच्च अदालतको विवादलाई क्यान्सरको संज्ञा दिदै ओलीले उक्त विवाद सामान्य रुपमा साम्य नहुने बताउनुभयो । त्यस्तै ओलीले माओवादी नेताले जनताका छोराछोरीलाई युद्धमा होमेर आफ्ना सन्तानलाई विदेशमा पढाएको भन्दै प्रचण्डप्रति कटाक्ष गर्नुभयो । सम्बोधनका क्रममा अध्यक्ष ओलीले सञ्चार क्षेत्रमा बैदेशिक लगानीलाई सरकारले नै प्रोत्साहन गर्नु दुर्भाग्य भएको टिप्पणी गर्नुभयो । युवा संघको यसअघिको ‘साइबर सेना’ को नाम परिवर्तन गरेर ‘साइबर सर्कल’ बनाइएको हो ।
