काठमाडौं, 23 दिसम्बर 2021
विगत सरकारका योजनाहरु कटौती गरेको र प्रदेश सरकारले मन्त्रालय फुटाउने कार्य गरेको भन्दै नेकपा एमालेले बिहीबार पनि बागमती प्रदेश सभाको बैठक अवरुद्ध गरेको छ । प्रदेशसभाको बैठक सभामुख सानुकुमार श्रेष्ठले सुरु गर्ने वित्तिकै एमालेका सदस्यले उठेर विरोध गरेका थिए । बैठकमा एमाले प्रदेशसभा सदस्य केशवराज पाण्डेले विना कारण आर्थिक भार थप्ने गरी मन्त्रालय फुटाइएको बिषयमा सरकारको जवाफ नआएसम्म बैठक चल्न नसक्ने बताउनुभयो । उहाले मुख्यमन्त्री प्रदेशसभाको बैठकबाट भागेको आरोप लगाउनुभयो । बैठकमा प्रदेश पर्यटन विधेयक र प्रदेश उच्च शिक्षा विधेयकलाई अन्तिम रुप दिने कार्यसुची थियो । साथै आन्तरिक मामिला तथा कानुन मन्त्री कृष्णप्रसाद खनालले केही प्रदेश ऐन संशोधनका लागि पेश गर्ने कार्यसुची रहेको सभामुखले जानकारी गराउनुभएको थियो । तर एमाले प्रदेशसभा सदस्य पाण्डेले आफुहरुले राखेका बिषयमा सरकारको धारणा नआएकाले बैठक चल्न नसक्ने बताउनुभएको थियो । एमाले प्रदेशसदस्यलाई पटकपटक बस्न आग्रह गरेपनि अवरोध भएपछि सभामुख श्रेष्ठले अर्को सुचना नआएसम्म बैठक स्थगित गर्नुभएको थियो ।
