काठमाडौं, 4 जनवरी 2022
समानता अभियान नेपालले दलितलगायतका सबै समुदायका मानिसले गुरुकुलमा अध्ययन गर्न पाउने व्यवस्था गर्न माग गरेको छ । मंगलबार काठमाडौंमा पत्रकार सम्मेलन गर्दै अभियानले देशभरका संस्कृत गुरुकुलमा दलित, आदिवासी, जनजाति, खस क्षेत्रीलगायत सबै जातजातिहरुलाई गुरुकुलमा पढ्न पाउने अधिकार सुनिश्चित् गर्न सरकारसँग माग गरेको हो । सबैका लागि शिक्षा भन्ने नेपालको संविधानको मौलिक हकमा सम्मानपूर्वक बाँच्न पाउने हकलगायतका हकहरुको व्यवस्थानुसार अधिकार सुनिश्चित् गर्न अभियानको माग छ । ‘गुरुकुलमा जातीय विभेद अन्त्य गरौं, सबैले वेद पुराण पढुन्’ भन्ने अभियानको नारा छ । कार्यक्रममा बोल्दै संयोजक चन्द्रकान्त पौडेलले जातीय प्रथा अन्त्य गरौं र गुरुकुलमा सबैले पढौं भनेर लामो समयदेखि भन्दै आएपनि अब भने खुलेरै आफ्नो संस्था अघि बढ्न चाहेको बताउनुभयो । समाजमा धर्मगुरु, पण्डितलाई एउटा श्रद्धाको दृष्टिले हेर्ने भन्दै उहाले त्यो श्रद्धा सबै जातले पाउनुपर्नेमा जोड दिनुभयो । गुरुकुलमा ९५ प्रतिशत भन्दा धेरै ब्राह्मण रहेको भन्दै अरु जातीले पनि पढ्न पाउनुपर्ने अभियानको माग छ ।
