काठमाडौं, 7 जनवरी 2022
नेकपा एकीकृत समाजवादीका अध्यक्ष माधवकुमार नेपालले राष्ट्रियसभा निर्वाचन अघि नै एमाले अध्यक्ष केपी ओलीले पराजय स्वीकार गरिसकेको बताउनुभएको छ । नेकपा एकीकृत समाजवादीको काठमाडौ महानगर कमिटीले शुक्रबार काठमाडौंमा आयोजना गरेको कार्यक्रममा अध्यक्ष नेपालले राष्ट्रिय सभाको निर्वाचनमा पराजय निश्चित छ भनेर ओलीले हार स्वीकार गरेको भन्दै आफुलाई अचम्म लागेको पनि बताउनुभयो । उहाले एकैदिन ७७ वटै जिल्लामा अधिवेशन उद्घाटन गर्ने एमालेको परिपाटीले नेतृत्व स्थापित नहुने उल्लेख गर्नुभयो । अध्यक्ष नेपालले एमालेभित्र कुनै नीति पद्धति नरहको भन्दै नेताको देवत्वकरण गर्ने, देउता जस्तो मान्ने प्रवृति हावी भएको जिकिर गर्नुभयो । उहाले एमालेमा रहेका मानिस वौद्धिकताको विकास गर्ने आधुनिक ज्ञान र चेतना हासिल गर्ने व्यक्ति नभई पूजक र हनुमान प्रवृतिका मानिसमात्र रहेको बताउनुभयो । केपी ओलीबाट नेकपा एमाले पार्टी नवन्ने र नचल्ने उहाको भनाई छ । उहाले अहिले ओलीले गठबन्धनलाई भाड्न खोजेको आरोप पनि लगाउनुभयो । फरक प्रसंगमा अध्यक्ष नेपालले यसअघि नारायणहिटीमा कुनै पसल नगर्न आफुले सुझाव दिएपनि एमाले नेतृत्वको सरकारले व्यापारिलाई रेष्टुरेन्ट खोल्न दिएर भ्रष्टाचारलाई प्रोत्साहन दिने काम गरेको बताउनुभयो । अध्यक्ष नेपालले अहिले आफ्नो पार्टीप्रति आकर्षण बढेको भन्दै पार्टीलाई बिधिसम्बत ढंगले सञ्चालन गर्ने धारणा राख्नुभयो । कार्यक्रममा सो पार्टीको काठमाडौ महानगर कमिटी अन्तर्गतको युवा संघ नेपाल, अनेमसंघ समाजवादी, नेपाल खेलकुल महासंघ समाजवादी र राष्ट्रिय जनसांस्कृतिक महासंघ नेपालको घोषणा तथा सपथग्रहण गराइएको थियो ।
