दिल्ली, 31 मार्च 2022
बंगलादेशको विश्विद्यालयमा बंगलादेशको ५०औं स्वतन्त्रता दिवस तथा राष्ट्रपिता बंगबन्धुको जन्मजयन्तीको अवसरमा भएको कार्यक्रममा नेपाली नाट्यसंस्था तथा रंगकर्मीले पनि सहभागिता जनाएको छ । जहाँगिरनगर विश्वविद्यालयको निमन्त्रणामा नेपालबाट वन वर्ल्ड थिएटरले सहभागिता जनाउँदै नाटक मञ्चन गरेको हो । रंगकर्मी राजकुमार पुडासैनी निर्देशित तथा अभिनित अनिसुर रेहमान लिखित काव्यात्मक मनोवाद ‘म शेख मुजिब’ मञ्चन गरिएको हो । उक्त नाटक वन वर्ल्ड थिएटरले सन् २०२० मा पहिलोपटक मञ्चन गरेको थियो । नाटकलाई नेपाली र अंग्रेजी भाषामा तयार गरिएको थियो । सो नाटक बंगलादेशमा मञ्चन हुँदा केही प्रतिकात्मक संवाद बंगाली भाषमा पनि प्रस्तुत गरिएको थियो । जसका लागि विश्वविद्यालयका प्राध्यापक मोहिबुर रउफ शैबल, नवरिन निपु, रिदी बसाकले साथ दिएका थिए । वन वर्ल्ड थिएटर काठमाडौंमा सक्रिय नाट्य संस्था हो । साताव्यापी भ्रमणका क्रममा रंगकर्मी पुडासैनीले बंगलादेशमा कार्यशाला पनि सञ्चालन गर्ने वन वर्ल्ड थिएटरले जनाएको छ ।
