काठमाडौं, 8 जून 2022
ब्रिटिश–गोर्खा भूतपूर्व सैनिक संगठन(बिगेसो)को सिंगापुर गोर्खाज बिभागले सिंगापुर प्रहरी सेवाबाट अवकास प्राप्त गोर्खाहरुमाथि बेलायत र सिंगापुर सरकारबाट ठूलो अन्याय र चर्को बिभेद भइरहेको भन्दै बेलायत सरकारको पुन ध्यानाकर्षण गराउने जनाएको छ । बुधबार काठमाडौंमा पत्रकार सम्मेलन गर्दै बिभागले एकै प्रकृतिका काम गर्ने दुई देशका नागरिकहरुले पाउने तलव, भत्ता, पेन्सन र अन्य सेवा सुविधामा अन्तर देखिनु दुखद भएको भन्दै बेलायत सरकारको पुन ध्यानाकर्षण गराउने जानकारी दिएको हो । बेलायतले सिंगापुरका लागि नेपाली युवाहरुलाई भर्ति गराउने जानकारी नेपाल सरकारको कुनै जिम्मेवार निकायहरुले नराखेको उनीहरुको भनाई छ । आफ्ना मागका बारेमा बेलायत सरकारको पुन ध्यानाकर्षण गराउन असार ३ गते शुक्रबार रत्नपार्कबाट बिरोध प्रदर्शन सुरु गरि लाजिम्पाटस्थीत बेलायती दुतावासमा पुगेर दुतावासमार्फत बेलायती प्रधानमन्त्रीलाई १६ बुँदे माग पत्र बुझाइने बिगेसो– सिंगापुर गोर्खाज बिभागका प्रमुख पल बहादुर घर्तिले जानकारी दिनुभयो । त्यस क्रममा दुतावासमा १ घण्टा धर्ना दिने उहाले बताउनुभयो । उहाले आफुहरु बिरुद्ध भएका बिभेद अन्त्यगरि मागहरु पुरा गराउन र नेपाल सरकारलाई पनि मागहरुप्रति संवेदनशिल बनाउनका आन्दोलन गर्न बाध्य भएको उल्लेख गर्नुभयो । १६ बुँदे माग पत्रका बारेमा कुनै सुनुवाई नभए देशव्यापी बिरोधका कार्यक्रम गर्ने र त्यसबाट पनि आफ्ना मुद्धा र मागहरु सम्बोधन नभए जातीय बिभेद तथा मानवअधिकार हनन्को मुद्धाको रुपमा जेनेभास्थीत संयुक्त राष्ट्र संघको मानवअधिकार आयोग र कानूनी उपचारका लागि नेपालको सर्वोच्च अदालत तथा बेलायतको उच्च अदालतमा दर्ज गरिने उनीहरुले जनाएका छन् । सन् १९४७ को असमान सन्धिअनुसार नेपालको स्वाधिनता र राष्ट्रियतामा विभेद गरिएको संगठनको भनाई छ ।
