काठमाडौं, 9 जून 2022
जनता समाजवादी पार्टी, नेपालका सांसद मोहम्मद इस्तियाक राइले मन्त्री परिवर्तन बिषयमा पार्टीभित्र कुनै विवाद नभएको दावी गर्नुभएको छ । बिहीबार संसद भवन नयाँ बानेश्वरमा सञ्चारकर्मीसंग कुरा गर्दै राईले मन्त्री परिवर्तन गर्न गुटगत भेला गरिएको र पार्टी फुटाउने कुरामा सत्यता नरहेको दावी गर्नुभएको हो । उहाले आफुलाई मन्त्री बन्न कुनै इच्छा नभएकाले यस बिषयमा आफुलाई अनावश्यक रुपमा नमुछ्न आग्रह गर्नुभयो । राईले सरकार गठन हुँदा अध्यक्ष उपेन्द्र यादवले संसदीय दल र केन्द्रीय कार्यकारीणी बैठकमा ६ महिनाका लागि मात्र मन्त्री बनाइएको र त्यसपछि नयाँ व्यक्तिलाई मन्त्रीपरिषद्मा पठाउने मौखिक रुपमा बताउनुभएको जानकारी दिनुभयो । अहिले पार्टीभित्र देखिएको विवाद अध्यक्ष यादवको एकलौटी निर्णयको बिरुद्ध भएको उहाले बताउनुभयो । राईले अध्यक्ष यादवले पार्टीलाई व्यक्तिगत रुपमा सञ्चालन गरेको र जसका कारण स्थानीय तहको निर्वाचनमा त्यसको असर देखिएको धारणा राख्नुभयो । स्थानीय तहको निर्वाचनको समिक्षा गर्न पनि अध्यक्ष यादव तयार नभएको उहाले बताउनुभयो । उहाले पार्टीलाई एक व्यक्तिको आधारमा नभएर सामूहिकतामा चलाउनुपर्नेमा आफुहरुको जोड रहेको जिकिर गर्नुभयो ।
