काठमाडौं, 4 जुलाई 2022
गृहमन्त्री बालकृष्ण खाणसँग नेपालका लागि भारतीय राजदूत नवीन श्रीवास्तवले शिष्टाचार भेट गरेका छन् । राजदूत नियुक्त भएर, नेपाल आएपछि श्रीवास्तवले गृहमन्त्री खाणसँग पहिलो पटक भेटघाट गरेका हुन् । गृह मन्त्रालयमा सोमबार बिहान भएको भेटमा दुई देशबीचको आपसी सम्बन्ध थप सुदृढ र प्रगाढ बनाउने बारेमा कुराकानी भएको थियो । भेटमा गृहमन्त्रीले नेपाल सरकार र भारत सरकारबीच भएको सम्झौता अनुरुप कृषि रासायनिक मल छिटो उपलब्ध गराउनका लागि सहजीकरण गरिदिन आग्रह गरेका थिए । जवाफमा राजदूत श्रीवास्तवले आफूले पहलकदमी लिने बताएका थिए । भेटमा गृहमन्त्रीले श्रीवास्तवलाई सफल कार्यकालका लागि शुभकामना दिएका थिए । यो भन्दा पहिला राजदुत श्रीवास्तवले प्रधानमन्त्री, परराष्ट्रमन्त्री, लगायत नेपालका राजनीतिक दलका नेताहरुसंग भेटघाट गरि सकेका छन।
