काठमाडौं, 14 जुलाई 2022
नेकपा माओवादी केन्द्रका अध्यक्ष पुष्पकमल दाहाल शुक्रबार भारत भ्रमणमा आउने भएका छन् । भारतीय जनता पार्टी(भाजपा) अध्यक्ष जेपी नड्डाको निम्तोमा दाहाल भारत भ्रमणमा जान लागेको उनको निजी सचिवालयले जनाएको छ ।
दाहालका स्वकीय सचिव रमेश मल्लका अनुसार दाहाल शुक्रबार दिउँसो 1 बजे भारतको राजधानी नयाँदिल्ली प्रस्थान गर्ने कार्यक्रम रहेको छ । भाजपा अध्यक्ष नड्डाले धेरैअघि निम्तो पठाए पनि राजनीतिक व्यस्तताले भ्रमण हुन नसकेको स्वकीय सचिव मल्लले बताए । मल्लले भने, ‘भाजपा अध्यक्ष जेपी नड्डाले धेरै अघि नै निम्तो पठाउनु भएको थियो ।
राजनीतिक व्यस्तताका कारणले अध्यक्ष कमरेडको भ्रमण हुन सकेको थिएन । शुक्रबार दिउँसो 1 बजे उहाँ दिल्ली जाँदै हुनुहुन्छ ।’ मल्लका अनुसार दाहालले दिल्लीमा एउटा कार्यक्रमलाई समेत सम्बोधन गर्नेछन् ।
भ्रमणका क्रममा प्रधानमन्त्री नरेन्द्र मोदीसँग पनि भेटवार्ता हुन सक्ने सम्भावना रहेको मल्लले बताए । दाहाल साउन 1 गते स्वदेश फर्कनेछन् ।
अहिले सत्तारुढ दल नेपाली कांग्रेसकी केन्द्रीय सदस्य आरजु राणा पनि भारत भ्रमणमै रहेकी छन्।
