काठमाडौं, 10 अगस्त 2022
नेकपा माओवादी केन्द्रका प्रमुख सचेतक देव गुरुङले प्रतिनिधिसभाको कार्यकाल पाँचवर्ष पुग्नुअगावै हुन लागेको निर्वाचन कार्यतालिकाका लागि ऐन आवश्यक रहेको टिप्पणी गरेका छन् । आजको प्रतिनिधिसभाको बैठकअन्तर्गत शून्य समयमा बोल्दै उनले यस्तो बताएका हुन् । ‘निर्वाचन घोषणा गर्ने अधिकार सरकारलाई छ । तर, प्रतिनिधिसभाको कार्यकाल पाँच वर्ष धारा ८५ (१) ले भनेको छ । सर्वोच्च अदालतको पाँच वर्ष घटाउन नहुने भनेको छ,’ उनले भने, ‘यो मध्यावधि निर्वाचन पनि होइन । ७६ (५) को सरकार विफल भएको पनि होइन । त्यसकारण निर्वाचन कार्यतालिकासम्बन्धी बिषयमा एउटा ऐन जरुरी पर्छ ।’ यस्तै प्रतिनिधिसभाको कार्यावधिको विषयमा पनि अर्को ऐन जरुरी रहेको उनले बताए । ‘प्रतिनिधिसभा परिवर्तनको परिकल्पना गरेको छ, रिक्तताको परिकल्पना गरेको छैन । रिक्तताको अवस्थामा मुलुकमा गम्भिर स्थिति पैदा गर्नसक्छ । त्यसकारण सरकारले तत्काल ऐन ल्याओस्, उनले भनेका छन्।
