दिल्ली, 24 सितंबर 2022
दशैं मनाउनका लागि भारतका विभिन्न शहरमा काम गर्न गएका नेपाली घर फर्किन थालेका छन् । नेपालगञ्जको जमुनाहा नाकामा यतिबेला घर फर्किएका नेपालीको भीड लाग्न थालेको छ । शनिबार बिहान जमुनाहा नाकामा घर फर्किएका नेपालीको लर्को नै थियो । रोजगारिको लागि भारतको विभिन्न ठाउँमा पुगेका नेपाली दशैं मनाउन घर फर्किएका हुन् । नेपालगञ्ज नाकामा यतिबेला दैनिक पाँच हजारभन्दा बढी नेपाली घर फर्किरहेका छन् । विशेष गरेर कर्णाली प्रदेशका विभिन्न जिल्लाका मानिस मौसमी कामका लागि भारतमा जाने गर्दछन् । घरपरिवारसँग बसेर दसैँ मनाउन उनीहरू घर फर्किरहेका छन् । इलाका प्रहरी कार्यालय, जमुनाहाका इन्चार्ज वरिष्ठ सई माधव रिजालले दैनिक पाँच हजार बढी मानिस दसैँ मनाउन घर फर्किरहेको जानकारी दिए । नाकामा आइपुगेपछि वा यात्राका क्रममा नेपाली लुटिने घटना यसपाली सुनिएको छैन । नाकामा पुगेर आफ्ना होटलमा लैजान तानातान गर्ने होटल सञ्चालक वा प्रतिनिधिलाई प्रहरीले कडाइ गरेको छ । भारतीय प्रहरीले शनिबार मात्रै दश जना होटल सञ्चालकलाई समातेर कारबाही अगाडि बढाएको छ ।
