काठमाडौं, 26 सितंबर 2022
समानुपातिक निर्वाचन प्रणालीतर्फ उम्मेदवारको बन्द सूची सच्याउन माग गर्दै नेपाली कांग्रेसको विद्रोही पक्षले आन्दोलनको घोषणा गरेको छ । सभापति शेरबहादुर देउवाले पार्टीभित्र शक्ति सन्तुलन नमिलाई एकलौटी रूपमा समानुपातिक उम्मेदवारको बन्द सूची तयार गरी बुझाएको भन्दै शेखर कोइराला पक्षले आन्दोलनको घोषणा गरेको हो । सोमबार ठमेलस्थित एक होटलमा बसेको शेखर पक्षको बैठकले सभापति शेरबहादुर देउवामाथि दबाब बढाउन यही बुधबार दिउँसो 12 बजे पार्टी कार्यालय सानेपामा धर्ना दिने निर्णय गरेको हो । गत बैसाखमा भएको स्थानीय तहको निर्वाचनदेखि सभापति देउवाप्रति रुष्ट बनेको कोइराला समुह मंसिर ४ गते हुने संघ र प्रदेशसभाको निर्वाचनको विषयमा पनि असन्तुष्ट बनेको छ । वर्तमान प्रधानमन्त्री समेत रहेका देउवाले आफूहरुलाई सधै पेलेरै पार्टीमा हरेक निर्णय गर्ने गरेको उक्त पक्षले जनाएकाे छ । त्यसकारण समान अवसर र न्यायका लागि एक घण्टे धर्ना कार्यक्रम तय गरिएको शेखर पक्षको भनाई छ । डा. कोइराला समुहले एकल बहुमत ल्याउने गरी भागबन्डा गर्न सभापति देउवालाई निरन्तर दबाब दिँदै आएको छ । उक्त पक्षले कम्तीमा पनि कांग्रेसलाई १०० सिट राखेर बाकिँ रहेका सिट अन्य दलहरूलाई भागबन्डा गर्नुपर्ने प्रस्ताव सभापति देउवा समक्ष राख्दै आएको हो। थोरै सिट लिएर निर्वाचनमा जाँदा कार्यकर्ता रुष्ट हुने उक्त पक्षको ठहर छ । भागबन्डा गर्दा कांग्रेसले बहुमत सिट नपाउने हो भने एक्लै निर्वाचनमा जानुपर्ने संस्थापन इतर समुहको दरो मत छ । तर, देउवा भने नेपाली कांग्रेसलाई ८० सिट दिए मनजुर हुने देखिएका छन् । यता डा. कोइरालाले यदि देउवाले आफ्नो कुरा नसुने पार्टीभित्र विद्रोह गर्ने समेत चेतावनी दिएका छन् ।
