काठमाडौं, 27 सितंबर 2022
अमेरिकाको विश्वव्यापी सार्वजनिक मामिलासम्बन्धी कार्यवाहक सहायकमन्त्री एलिजाबेथ केनेडी ट्रुडो बुधबार नेपाल आउने भएकी छिन् । उनी नेपालसहित युएई, उज्वेकिस्तान र किर्गिज रिपब्लिकको १२ दिने भ्रमणमा रहेको अमेरिकी विदेश मन्त्रालयले जारी गरेको विज्ञप्तिमा उल्लेख छ । अमेरिकी विदेश मन्त्रालयले प्रेस विज्ञप्ति जारी गर्दै ट्रुडोको नेपाल भ्रमणबारे जानकारी दिएको हो । ट्रुडोले भ्रमणमा रहँदा रूस र चीनबाट दिने मिथ्या सूचनाको प्रतिरोध, अफगानिस्तानका जनतालाई जारी अमेरिकी समर्थन, सामाजिक समानता, प्रेस स्वतन्त्रता र वातावरणलगायत अमेरिकी कूटनीति र सन्देशहरुलाई प्राथमिकता दिनेछिन् । कार्यवाहक सहायकमन्त्री ट्रुडोले नेपालमा रहँदा अल्पसंख्यक समूहका अभियन्ताहरु, पत्रकारहरु र मिथ्या सूचना तथा लोकतन्त्रमा सञ्चारको भूमिकाबारे विभिन्न क्षेत्रका व्यक्तिसँग अन्तरक्रिया गर्ने कार्यक्रम रहेको छ । ट्रुडोले सरकारी अधिकारीहरू र नागरिक समाज, विदेशी मिडिया, प्रभावशाली व्यक्तित्व, विद्यार्थी र अमेरिकी सार्वजनिक कूटनीति क्षेत्रका व्यक्तित्वहरुसँग भेट गर्ने कार्यतालिका छ । नेपाल बसाइँमा ट्रुडोले अमेरिकी राजदूत सम्पदा संरक्षण कोषले सहयोग गर्दै आएका पाटन दरबार क्षेत्र र वसन्तपुर दरबार क्षेत्रलगायत सांस्कृतिक सम्पदाको अवलोकन गर्ने कार्यक्रम छ । उनको भ्रमणमा नेपालमा राजनीतिक भेटवार्ता गर्ने कार्यक्रम भने नरहेको बताइएको छ ।
