चितवन, 14 नवम्बर 2022
नेपाल कम्यूनिष्ट पार्टी (एमाले)का अध्यक्ष केपि शर्मा ओलीले सत्ता गठबन्धन देशका लागि अभिसाप रहेको बताएका छन्। आज भरतपुरमा एमालेको चुनावी सभालाई सम्बोधन गर्दै अध्यक्ष ओलीले गठबन्धन जनताका लागि नभई खानाका लागि गरिएको बताएका हुन्।
‘एमालेले सरकारी स्कुल बनायो, अस्पताल देशभर एकैपटक शिलन्यास गर्यो। ६१ वटा राजमार्ग विस्तारको काम सुरु गर्यो। विमानस्थाल बनाउने काम गर्यो। तराईमा हुलाकी राजमार्ग विस्तार गर्दा पैसा पुग्छ,’ उनले भने, ‘गठबन्धन आउँदा किन त्यस्तो हुँदैन भन्दा खानाको बाहेक ध्यान छैन।’ उनले गठबन्धनलाई फुटेका हाडिको चोइटाको संज्ञा दिए।
उनले गएको स्थानीय तहमा गठबन्धनले ५ जना मारेको भन्दै अहिले हार्ने डरले विपक्षमाथि हातपात गर्न लागेको बताए। ‘गठबन्धन कति कमजोर रहेछ । एउटा युवा आयो चुनाव लड्यो। गाडी फुटाउनु पर्छ,’ चितवनमा हिजो गठबन्धनले रवि लामिछानेको चुनावी अभियानमा प्रयोग गरेको गाडि तोडफोडको प्रति संकेत गर्दै,’उनले भने, ‘लोकतन्त्रको रक्षाको लागि गठबन्धन गरेका हौँ भन्ने मान्छेले टाउँका फुटाउँछ ।’ प्रशासनको सहयोगमा गुण्डागर्दिको काम भएको उनले बताए।
‘गुण्डागर्दिका कामहरु पार्टीको तर्फबाट विरोध र निन्दा गछौँ। काम कारबाही गर्न प्रशासनले एउटा ड्याङग्रो पनि बजाएको छैन’–उनले भने। गठबन्धन दलहरुले जनता ढाँट्नका लागि घोषणापत्र जारी गरेका छन्।
उनले देश बनाउने मार्गचित्र एमालेको गन्तव्य भएको बताए। कृषिको आधुनिकीकरण कसरी हुन्छ, व्यापार असन्तुलन कसरी घटाउने भन्ने एमालेको स्पष्ट मार्गचित्र भएको बताए। ओलीले एमाले सरकारमा हुँदा विकास निर्माणका कामहरु थालनी गरेपनि योजनाहरु सबै काटेको बताए। समृद्ध नेपाल निर्माणका लागि एमालेले बहुमत ल्यान आवश्यक रहेको ओलीले जिकिर गरे।
